الترجمة الأردية

ہم سے اسحاق بن منصور نے بیان کیا، انہوں نے کہا ہم سے نضر بن شمیل نے بیان کیا، انہوں نے کہا ہمیں عبداللہ بن عون نے محمد بن سیرین سے خبر دی، انہوں نے حضرت ابوہریرہ رضی اللہ تعالیٰ عنہ سے روایت کیا کہ رسول اللہ صلی اللہ تعالیٰ علیہ وآلہ وسلم نے ہمیں عشاء کی دو نمازوں (ظہر یا عصر) میں سے ایک نماز پڑھائی — ابن سیرین نے کہا: حضرت ابوہریرہ رضی اللہ تعالیٰ عنہ نے اس نماز کا نام لیا تھا لیکن مجھے یاد نہیں رہا — آپ صلی اللہ تعالیٰ علیہ وآلہ وسلم نے ہمیں دو رکعتیں پڑھا کر سلام پھیر دیا۔ پھر مسجد میں رکھی ہوئی ایک لکڑی کے سہارے کھڑے ہو گئے۔ ایسا لگتا تھا جیسے آپ ناراض ہوں۔ آپ صلی اللہ تعالیٰ علیہ وآلہ وسلم نے دایاں ہاتھ بائیں پر رکھا اور انگلیاں ایک دوسرے میں پیوست کیں اور داہنا رخسار مبارک بائیں ہاتھ کی پشت پر رکھ لیا۔ جلد باز لوگ مسجد کے دروازوں سے نکل گئے اور کہنے لگے: نماز کم ہو گئی۔ حاضرین میں حضرت ابوبکر صدیق اور حضرت عمر فاروق رضی اللہ تعالیٰ عنہما بھی تھے لیکن دونوں حضرات کو آپ صلی اللہ تعالیٰ علیہ وآلہ وسلم سے بات کرنے کی ہمت نہ ہوئی۔ حاضرین میں ایک صاحب تھے جن کے ہاتھ لمبے تھے، انہیں ذوالیدین کہا جاتا تھا۔ انہوں نے عرض کیا: یا رسول اللہ! کیا آپ بھول گئے یا نماز کم کر دی گئی ہے؟ آپ صلی اللہ تعالیٰ علیہ وآلہ وسلم نے ارشاد فرمایا: نہ میں بھولا ہوں اور نہ نماز کم ہوئی ہے۔ پھر لوگوں سے پوچھا: کیا ذوالیدین صحیح کہہ رہے ہیں؟ سب نے کہا: ہاں۔ تو آپ صلی اللہ تعالیٰ علیہ وآلہ وسلم آگے بڑھے اور بقیہ نماز پوری فرمائی، پھر سلام پھیرا، پھر تکبیر کہی اور سجدۂ سہو کیا — اپنے معمول کے سجدے کی مانند یا اس سے لمبا — پھر سر اٹھایا اور تکبیر کہی، پھر تکبیر کہی اور دوسرا سجدہ کیا — معمول کی مانند یا اس سے لمبا — پھر سر اٹھایا اور تکبیر کہی۔ (لوگوں نے ابن سیرین سے بار بار پوچھا:) پھر سلام پھیرا؟ تو وہ کہتے: مجھے بتایا گیا ہے کہ حضرت عمران بن حصین رضی اللہ تعالیٰ عنہ نے فرمایا: پھر سلام پھیرا۔