اردو ترجمہ

ہم سے عبدان نے بیان کیا، کہا کہ ہمیں عبداللہ بن مبارک رحمۃ اللہ تعالیٰ علیہ نے خبر دی، کہا کہ ہمیں یونس نے خبر دی، انہیں زہری نے، انہیں عروہ بن حضرت زبیر اور سعید بن مسیب نے بیان کیا کہ حضرت حکیم بن حزام رضی اللہ تعالیٰ عنہ نے فرمایا: میں نے رسول اللہ صلی اللہ تعالیٰ علیہ وآلہ وسلم سے کچھ مانگا، آپ صلی اللہ تعالیٰ علیہ وآلہ وسلم نے عطا فرمایا۔ میں نے پھر مانگا اور آپ صلی اللہ تعالیٰ علیہ وآلہ وسلم نے پھر عطا فرمایا۔ میں نے پھر مانگا اور آپ صلی اللہ تعالیٰ علیہ وآلہ وسلم نے پھر بھی عطا فرمایا۔ اس کے بعد آپ صلی اللہ تعالیٰ علیہ وآلہ وسلم نے ارشاد فرمایا: اے حکیم! یہ دولت بڑی سرسبز اور بہت ہی شیریں ہے۔ لیکن جو شخص اسے اپنے دل کو سخی رکھ کر لے تو اس کی دولت میں برکت ہوتی ہے۔ اور جو لالچ کے ساتھ لیتا ہے تو اس کی دولت میں کچھ بھی برکت نہیں ہو گی، اس کا حال اس شخص جیسا ہو گا جو کھاتا ہے لیکن آسودہ نہیں ہوتا۔ (یاد رکھو) اوپر کا ہاتھ نیچے کے ہاتھ سے بہتر ہے۔ حضرت حکیم رضی اللہ تعالیٰ عنہ نے فرمایا: میں نے عرض کیا: اس ذات کی قسم جس نے آپ کو سچائی کے ساتھ مبعوث فرمایا ہے! اب اس کے بعد میں کسی سے کوئی چیز نہیں لوں گا، تاآنکہ اس دنیا ہی سے جدا ہو جاؤں۔ چنانچہ حضرت ابوبکر صدیق رضی اللہ تعالیٰ عنہ حضرت حکیم رضی اللہ تعالیٰ عنہ کو ان کا معمولی وظیفہ دینے کو بلاتے تو وہ لینے سے انکار فرما دیتے۔ پھر حضرت عمر رضی اللہ تعالیٰ عنہ نے بھی انہیں ان کا حصہ دینا چاہا تو انہوں نے اس کے لینے سے بھی انکار فرما دیا۔ اس پر حضرت عمر رضی اللہ تعالیٰ عنہ نے فرمایا: مسلمانو! میں تمہیں حکیم بن حزام کے معاملے میں گواہ بناتا ہوں کہ میں نے ان کا حق اس مالِ فے سے انہیں دینا چاہا لیکن انہوں نے لینے سے انکار فرما دیا۔ غرض حضرت حکیم بن حزام رضی اللہ تعالیٰ عنہ رسول اللہ صلی اللہ تعالیٰ علیہ وآلہ وسلم کے بعد اسی طرح کسی سے بھی کوئی چیز لینے سے ہمیشہ انکار ہی فرماتے رہے، یہاں تک کہ وصال فرما گئے۔