Urdu Translation

حضرت خباب رضی اللہ تعالیٰ عنہ سے روایت ہے، انہوں نے فرمایا: میں زمانہ جاہلیت میں لوہار تھا اور عاص بن وائل (کافر) پر میرے کچھ درہم قرض تھے۔ میں اس کے پاس تقاضا کرنے گیا تو اس نے کہا: جب تک تو محمد (صلی اللہ تعالیٰ علیہ وآلہ وسلم) کا انکار نہیں کرے گا میں تیرا قرض ادا نہیں کروں گا۔ میں نے کہا: ہرگز نہیں! اللہ کی قسم! میں محمد صلی اللہ تعالیٰ علیہ وآلہ وسلم کا کبھی انکار نہیں کروں گا یہاں تک کہ اللہ تعالیٰ تجھے مارے اور پھر دوبارہ اٹھائے۔ اس نے کہا: تو پھر مجھے چھوڑ دے یہاں تک کہ میں مر جاؤں پھر دوبارہ زندہ کیا جاؤں، مجھے (اس وقت) مال اور اولاد دی جائے گی تو تیرا قرض ادا کر دوں گا۔ اس پر یہ آیت نازل ہوئی: «أَفَرَأَيْتَ الَّذِي كَفَرَ بِآيَاتِنَا وَقَالَ لَأُوتَيَنَّ مَالًا وَوَلَدًا» (بھلا تم نے اس شخص کو دیکھا جس نے ہماری آیتوں کا انکار کیا اور کہا کہ مجھے ضرور مال اور اولاد دی جائے گی) آخر آیت تک۔