الترجمة الأردية

سیدنا عبداللہ بن عمرو رضی اللہ عنہما نے بیان کیا کہ رسول اللہصلی اللہ علیہ وسلمتک میری یہ بات پہنچائی گئی کہ: خدا کی قسم! زندگی بھر میں دن میں تو روزے رکھوں گا اور ساری رات عبادت کروں گا۔ میں نے (رسول اللہصلی اللہ علیہ وسلمسے) عرض کی: میرے ماں باپ آپ پر فدا ہوں، ہاں میں نے یہ کہا ہے۔ آپ نے فرمایا:”لیکن تیرے اندر اس کی طاقت نہیں، اس لیے روزہ بھی رکھ اور بے روزہ بھی رہ، عبادت بھی کر اور سو بھی اور مہینے میں تین دن کے روزے رکھا کر، نیکیوں کا بدلہ دس گنا ہے، اس طرح یہ ساری عمر کا روزہ ہو جائے گا۔“میں نے کہا کہ میں اس سے بھی زیادہ کی طاقت رکھتا ہوں۔ آپ نے فرمایا:”پھر ایک دن روزہ رکھا کر اور دو دن کے لیے روزے چھوڑ دیا کر۔“میں نے پھر کہا کہ میں اس سے بھی زیادہ کی طاقت رکھتا ہوں۔ آپ نے فرمایا:”اچھا ایک دن روزہ رکھ اور ایک دن بے روزہ رہ کہ داؤد علیہ السلام کا روزہ ایسا ہی تھا اور روزہ کا یہ سب سے افضل طریقہ ہے۔“میں نے اب بھی وہی کہا کہ مجھے اس سے بھی زیادہ کی طاقت ہے، لیکن اس مرتبہ آپ نے فرمایا:”اس سے افضل کوئی روزہ نہیں ہے۔“[اللؤلؤ والمرجان/كتاب الصيام/حدیث: 714]