الترجمة الأردية

حضرت حذیفہ رضی اللہ تعالیٰ عنہ سے روایت ہے کہ ہم حضرت عمر رضی اللہ تعالیٰ عنہ کے پاس بیٹھے ہوئے تھے، انہوں نے پوچھا: تم میں سے کون فتنے کے بارے میں نبی کریم صلی اللہ تعالیٰ علیہ وآلہ وسلم کا ارشاد یاد رکھتا ہے؟ حضرت حذیفہ رضی اللہ تعالیٰ عنہ نے فرمایا: انسان کا فتنہ اس کی بیوی، اس کے مال، اس کی اولاد اور اس کے پڑوسی کے معاملے میں ہوتا ہے، جس کا کفارہ نماز، صدقہ، نیکی کا حکم دینا اور برائی سے روکنا کر دیتا ہے۔ حضرت عمر رضی اللہ تعالیٰ عنہ نے فرمایا: میں اس فتنے کے بارے میں نہیں پوچھتا بلکہ اُس فتنے کے بارے میں پوچھتا ہوں جو سمندر کی طرح ٹھاٹھیں مارے گا۔ حضرت حذیفہ رضی اللہ تعالیٰ عنہ نے فرمایا: اے امیر المومنین! آپ کو اس سے کوئی خطرہ نہیں، کیونکہ آپ کے اور اس کے درمیان ایک بند دروازہ ہے۔ حضرت عمر رضی اللہ تعالیٰ عنہ نے پوچھا: کیا وہ دروازہ توڑا جائے گا یا کھولا جائے گا؟ فرمایا: توڑا جائے گا۔ حضرت عمر رضی اللہ تعالیٰ عنہ نے کہا: تب تو پھر وہ کبھی بند نہ ہوگا۔ میں نے کہا: جی ہاں۔ ہم نے حضرت حذیفہ رضی اللہ تعالیٰ عنہ سے پوچھا: کیا عمر رضی اللہ تعالیٰ عنہ جانتے تھے وہ دروازہ کون ہے؟ فرمایا: ہاں، جیسے مجھے معلوم ہے کہ کل سے پہلے رات آئے گی، کیونکہ میں نے ان سے ایسی حدیث بیان کی تھی جو بے بنیاد نہیں ہے۔ ہمیں حضرت حذیفہ رضی اللہ تعالیٰ عنہ سے پوچھنے میں ڈر لگا کہ وہ دروازہ کون ہے۔ چنانچہ ہم نے مسروق رحمۃ اللہ تعالیٰ علیہ سے کہا کہ وہ پوچھیں۔ انہوں نے پوچھا: وہ دروازہ کون ہے؟ فرمایا: عمر (رضی اللہ تعالیٰ عنہ)۔