الترجمة الأردية

ہم سے عبداللہ بن محمد نے بیان کیا، کہا ہم سے ہشام نے بیان کیا، کہا ہمیں معمر نے خبر دی۔ اور مجھ سے محمود نے بیان کیا، کہا ہم سے عبدالرزاق نے بیان کیا، کہا ہمیں معمر نے خبر دی، زہری سے، انہوں نے سالم سے، انہوں نے اپنے والد حضرت عبداللہ بن عمر رضی اللہ تعالیٰ عنہما سے روایت کیا کہ نبی کریم صلی اللہ تعالیٰ علیہ وآلہ وسلم کے زمانے میں جب کوئی شخص خواب دیکھتا تو رسول اللہ صلی اللہ تعالیٰ علیہ وآلہ وسلم سے بیان کرتا۔ مجھے بھی آرزو تھی کہ کوئی خواب دیکھوں اور رسول اللہ صلی اللہ تعالیٰ علیہ وآلہ وسلم سے بیان کروں۔ میں نوجوان لڑکا تھا اور نبی کریم صلی اللہ تعالیٰ علیہ وآلہ وسلم کے عہد مبارک میں مسجد میں سویا کرتا تھا۔ میں نے خواب میں دیکھا کہ دو فرشتے مجھے پکڑ کر آگ کی طرف لے گئے جو کنویں کی طرح بنائی گئی تھی اور اس کے دو ستون تھے اور اس میں کچھ لوگ تھے جنہیں میں پہچانتا تھا۔ میں نے کہنا شروع کیا کہ میں آگ سے اللہ کی پناہ مانگتا ہوں۔ پھر ایک فرشتے نے ہم سے ملاقات کی اور مجھ سے کہا ڈرو نہیں۔ میں نے یہ خواب حضرت اُمّ المؤمنین حفصہ رضی اللہ تعالیٰ عنہا سے بیان کیا اور انہوں نے رسول اللہ صلی اللہ تعالیٰ علیہ وآلہ وسلم سے بیان کیا۔ آپ نے ارشاد فرمایا عبداللہ نیک آدمی ہے، کاش وہ رات کو (تہجد کی) نماز پڑھے۔ اس کے بعد سے عبداللہ رات کو بہت کم سوتے تھے۔