اردو ترجمہ

حضرت براء بن عازب رضی اللہ تعالیٰ عنہما فرماتے ہیں کہ رسول اللہ صلی اللہ تعالیٰ علیہ وآلہ وسلم جب اپنے بستر پر آتے تو دائیں کروٹ لیٹتے پھر فرماتے: اَللّٰہُمَّ اَسْلَمْتُ نَفْسِیْ اِلَیْکَ وَوَجَّہْتُ وَجْہِیْ اِلَیْکَ وَفَوَّضْتُ اَمْرِیْ اِلَیْکَ وَاَلْجَاْتُ ظَہْرِیْ اِلَیْکَ رَغْبَۃً وَّرَہْبَۃً اِلَیْکَ لَا مَلْجَاَ وَلَا مَنْجَا مِنْکَ اِلَّاۤ اِلَیْکَ اٰمَنْتُ بِکِتَابِکَ الَّذِیْ اَنْزَلْتَ وَنَبِیِّکَ الَّذِیْ اَرْسَلْتَ (اے اللہ! میں نے اپنی جان تیرے سپرد کی، اپنا چہرہ تیری طرف پھیرا، اپنا معاملہ تیرے سپرد کیا اور اپنی پیٹھ تیری طرف ٹیک لگائی، تیری طرف رغبت اور تجھ سے خوف کی وجہ سے۔ تیری پناہ کے سوا کوئی پناہ اور تجھ سے بچنے کی کوئی جگہ نہیں۔ میں تیری نازل کی ہوئی کتاب پر اور تیرے بھیجے ہوئے نبی پر ایمان لایا)۔ اور رسول اللہ صلی اللہ تعالیٰ علیہ وآلہ وسلم نے فرمایا: جو شخص یہ کلمات کہے پھر اسی رات مر جائے تو فطرت (اسلام) پر مرے گا۔ ایک روایت میں ہے کہ آپ صلی اللہ تعالیٰ علیہ وآلہ وسلم نے ایک شخص سے فرمایا: اے فلاں! جب تو اپنے بستر پر آئے تو نماز جیسا وضو کر پھر دائیں کروٹ لیٹ پھر کہہ: اَللّٰہُمَّ اَسْلَمْتُ نَفْسِیْ اِلَیْکَ ... اَرْسَلْتَ تک۔ اور فرمایا: اگر تو اسی رات مر جائے تو فطرت پر مرے گا اور اگر صبح کرے تو بھلائی پائے گا۔ (بخاری و مسلم)