اردو ترجمہ

ہم سے مسدد نے بیان کیا، انہوں نے کہا ہم سے حضرت ابومعاویہ نے اعمش سے بیان کیا، انہوں نے ابوصالح ذکوان سے، انہوں نے حضرت ابوہریرہ رضی اللہ تعالیٰ عنہ سے، انہوں نے نبی کریم صلی اللہ تعالیٰ علیہ وآلہ وسلم سے روایت کیا۔ آپ صلی اللہ تعالیٰ علیہ وآلہ وسلم نے ارشاد فرمایا: جماعت کی نماز گھر یا بازار کی نماز سے پچیس درجے زیادہ افضل ہے۔ اس لیے کہ جب تم میں سے کوئی اچھی طرح وضو کرے اور مسجد میں صرف نماز کی نیت سے آئے تو ہر قدم پر اللہ تعالیٰ اس کا ایک درجہ بلند فرماتا ہے اور ایک گناہ معاف فرماتا ہے، یہاں تک کہ وہ مسجد میں داخل ہو جائے۔ جب وہ مسجد میں داخل ہو جائے تو جب تک نماز کے انتظار میں رہے، اسے نماز ہی کی حالت میں شمار کیا جائے گا۔ اور جب تک وہ اپنے اس مصلے پر بیٹھا رہے جہاں اس نے نماز ادا کی ہو، فرشتے اس کے لیے دعا کرتے رہتے ہیں: اے اللہ! اسے بخش دے، اے اللہ! اس پر رحم فرما — جب تک کہ وہ وضو نہ توڑے (یعنی ریاح خارج نہ کرے)۔