اردو ترجمہ

ہم سے سلیمان بن حرب نے بیان کیا، کہا ہم سے حماد بن زید نے ایوب رحمۃ اللہ تعالیٰ علیہ سے بیان کیا، انہوں نے محمد بن سیرین رحمۃ اللہ تعالیٰ علیہ سے، انہوں نے حضرت ابوہریرہ رضی اللہ تعالیٰ عنہ سے، آپ نے فرمایا کہ ایک شخص نبی کریم صلی اللہ تعالیٰ علیہ وآلہ وسلم کے سامنے کھڑا ہوا اور ایک کپڑے میں نماز پڑھنے کے بارے میں دریافت کیا۔ آپ صلی اللہ تعالیٰ علیہ وآلہ وسلم نے ارشاد فرمایا کیا تم سب کے پاس دو کپڑے ہوتے ہیں؟ پھر ایک شخص نے حضرت عمر رضی اللہ تعالیٰ عنہ سے یہی سوال کیا تو انہوں نے فرمایا جب اللہ تعالیٰ نے تمہیں وسعت دی ہے تو تم بھی وسعت سے پہنو۔ آدمی اپنے کپڑے جمع کر لے۔ کوئی تہبند اور چادر میں نماز پڑھے، کوئی تہبند اور قمیص میں، کوئی تہبند اور قباء میں، کوئی پاجامہ اور چادر میں، کوئی پاجامہ اور قمیص میں، کوئی پاجامہ اور قباء میں، کوئی جانگیا اور قباء میں، کوئی جانگیا اور قمیص میں۔ حضرت ابوہریرہ رضی اللہ تعالیٰ عنہ نے فرمایا کہ میرا خیال ہے کہ انہوں نے یہ بھی فرمایا تھا کہ جانگیا اور چادر میں بھی (نماز پڑھ سکتے ہیں)۔