اردو ترجمہ

ہم سے سعید بن عفیر نے بیان کیا، کہا کہ مجھ سے لیث نے بیان کیا، ان سے عبدالرحمٰن بن خالد نے بیان کیا، ان سے ابن شہاب نے، ان سے حضرت امام زین العابدین علی بن حسین رضی اللہ تعالیٰ عنہما نے فرمایا کہ نبی کریم صلی اللہ تعالیٰ علیہ وآلہ وسلم کی زوجہ مطہرہ حضرت اُمّ المؤمنین صفیہ رضی اللہ تعالیٰ عنہا نے انہیں خبر دی (دوسری سند) اور امام بخاری رحمۃ اللہ تعالیٰ علیہ نے فرمایا کہ ہم سے عبداللہ بن محمد نے بیان کیا کہا کہ ہم سے ہشام نے بیان کیا، انہیں معمر نے خبر دی، انہیں زہری نے، انہیں حضرت علی بن حسین رضی اللہ تعالیٰ عنہما نے فرمایا کہ نبی کریم صلی اللہ تعالیٰ علیہ وآلہ وسلم مسجد میں (اعتکاف میں) تھے آپ کے پاس ازواج مطہرات بیٹھی تھیں۔ جب وہ چلنے لگیں تو آپ نے حضرت اُمّ المؤمنین صفیہ بنت حیی رضی اللہ تعالیٰ عنہا سے ارشاد فرمایا کہ جلدی نہ کر، میں تمہیں چھوڑنے چلتا ہوں۔ ان کا حجرہ دار حضرت اسامہ رضی اللہ تعالیٰ عنہ میں تھا، چنانچہ جب رسول اللہ صلی اللہ تعالیٰ علیہ وآلہ وسلم ان کے ساتھ نکلے تو دو انصاری صحابیوں رضی اللہ تعالیٰ عنہما سے آپ صلی اللہ تعالیٰ علیہ وآلہ وسلم کی ملاقات ہوئی۔ ان دونوں حضرات نے نبی کریم صلی اللہ تعالیٰ علیہ وآلہ وسلم کو دیکھا اور جلدی سے آگے بڑھ جانا چاہا۔ لیکن آپ نے ارشاد فرمایا ٹھہرو! ادھر سنو! یہ حضرت اُمّ المؤمنین صفیہ بنت حیی رضی اللہ تعالیٰ عنہا ہیں (جو میری بیوی ہیں)۔ ان حضرات نے عرض کیا، سبحان اللہ! یا رسول اللہ! آپ نے ارشاد فرمایا کہ شیطان (انسان کے جسم میں) خون کی طرح دوڑتا ہے اور مجھے خطرہ یہ ہوا کہ کہیں تمہارے دلوں میں بھی کوئی (بری) بات نہ ڈال دے۔