اردو ترجمہ

ہم سے موسیٰ بن اسماعیل نے بیان کیا، کہا کہ ہم سے وہیب بن خالد نے بیان کیا، کہا کہ ہم سے ایوب سختیانی نے بیان کیا، ان سے ابوقلابہ نے اور ان سے حضرت انس رضی اللہ تعالیٰ عنہ نے فرمایا کہ رسول اللہ صلی اللہ تعالیٰ علیہ وآلہ وسلم نے — ہم بھی آپ صلی اللہ تعالیٰ علیہ وآلہ وسلم کے ساتھ تھے — مدینہ منورہ میں ظہر کی نماز چار رکعت پڑھی اور ذوالحلیفہ میں عصر کی دو رکعت ادا فرمائیں۔ پھر رات وہیں بسر فرمائی یہاں تک کہ صبح ہو گئی۔ پھر سوار ہوئے اور جب بیداء پر پہنچے تو اللہ تعالیٰ کی حمد، تسبیح اور تکبیر بیان فرمائی۔ اس کے بعد حج اور عمرہ دونوں کا احرام باندھا اور لوگوں نے بھی دونوں کا احرام باندھا (یعنی حجِ قران کیا)۔ جب ہم مکہ مکرمہ پہنچے تو آپ صلی اللہ تعالیٰ علیہ وآلہ وسلم نے لوگوں کو حکم فرمایا (جن کے ساتھ قربانی نہیں تھی) تو انہوں نے حلال ہو کر احرام کھول دیا۔ یہاں تک کہ آٹھویں ذی الحجہ (یومِ ترویہ) کو انہوں نے حج کا احرام باندھا۔ حضرت انس رضی اللہ تعالیٰ عنہ نے فرمایا کہ نبی کریم صلی اللہ تعالیٰ علیہ وآلہ وسلم نے اپنے دستِ مبارک سے کھڑے ہو کر کئی اونٹ نحر فرمائے۔ اور رسول اللہ صلی اللہ تعالیٰ علیہ وآلہ وسلم نے (عیدالاضحی کے دن) مدینہ منورہ میں بھی دو چتکبرے سینگوں والے مینڈھے ذبح فرمائے۔ ابوعبداللہ (امام بخاری رحمۃ اللہ تعالیٰ علیہ) نے فرمایا کہ بعض لوگ اس حدیث کو ایوب سے، وہ ایک شخص سے، وہ حضرت انس رضی اللہ تعالیٰ عنہ سے بیان کرتے ہیں۔