اردو ترجمہ

ہم سے عبداللہ بن منیر نے بیان کیا، انہوں نے ابوالنضر سالم بن ابی امیہ سے سنا، انہوں نے بیان کیا کہ ہم سے عبدالرحمٰن بن عبداللہ بن دینار نے بیان کیا، ان سے ان کے والد نے، ان سے ابوصالح نے اور ان سے حضرت ابوہریرہ رضی اللہ تعالیٰ عنہ نے فرمایا کہ رسول اللہ صلی اللہ تعالیٰ علیہ وآلہ وسلم نے ارشاد فرمایا: جو شخص حلال کمائی سے ایک کھجور کے برابر صدقہ کرے — اور اللہ تعالیٰ صرف حلال کمائی کے صدقہ کو قبول فرماتا ہے — تو اللہ تعالیٰ اسے اپنے داہنے ہاتھ سے قبول فرماتا ہے، پھر صدقہ کرنے والے کے فائدے کے لیے اس میں زیادتی فرماتا ہے، بالکل اسی طرح جیسے کوئی اپنے جانور کے بچے کو کھلا پلا کر بڑھاتا ہے، تاآنکہ اس کا صدقہ پہاڑ کے برابر ہو جاتا ہے۔ عبدالرحمٰن کے ساتھ اس روایت کی متابعت سلیمان نے عبداللہ بن دینار کی روایت سے کی ہے۔ اور ورقاء نے ابن دینار سے بیان کیا، ان سے سعید بن یسار نے، ان سے حضرت ابوہریرہ رضی اللہ تعالیٰ عنہ نے، ان سے نبی کریم صلی اللہ تعالیٰ علیہ وآلہ وسلم نے۔ اور اس کی روایت مسلم بن ابی مریم، زید بن اسلم اور سہیل نے ابوصالح سے کی، ان سے حضرت ابوہریرہ رضی اللہ تعالیٰ عنہ نے، ان سے نبی کریم صلی اللہ تعالیٰ علیہ وآلہ وسلم نے۔