اردو ترجمہ

ہم سے محمود بن غیلان نے بیان کیا، کہا ہم سے عبدالرزاق نے بیان کیا، کہا ہمیں معمر نے خبر دی، انہیں عبداللہ بن طاؤس نے، انہیں ان کے والد نے اور ان سے حضرت ابوہریرہ رضی اللہ تعالیٰ عنہ نے روایت کیا کہ ملک الموت کو حضرت موسیٰ علیہ السلام کے پاس (آدمی کی شکل میں) بھیجا گیا۔ جب وہ آئے تو حضرت موسیٰ علیہ السلام نے (نہ پہچان کر) انہیں ایک زور کا طمانچہ مارا اور ان کی آنکھ پھوڑ ڈالی۔ وہ اپنے رب کے حضور واپس گئے اور عرض کیا: تو نے مجھے ایسے بندے کی طرف بھیجا جو موت نہیں چاہتا۔ اللہ تعالیٰ نے ان کی آنکھ بحال فرما دی اور فرمایا: واپس جا اور ان سے کہہ کہ وہ اپنا ہاتھ ایک بیل کی پیٹھ پر رکھیں، اور ان کے ہاتھ کے نیچے جتنے بال آ جائیں ہر بال کے بدلے ایک سال کی زندگی عطا ہوگی۔ حضرت موسیٰ علیہ السلام نے عرض کیا: اے میرے رب! پھر اس کے بعد کیا ہوگا؟ ارشاد ہوا: پھر موت ہے۔ حضرت موسیٰ علیہ السلام نے فرمایا: تو ابھی ہی آ جائے۔ پھر انہوں نے اللہ تعالیٰ سے دعا فرمائی کہ انہیں ارض مقدس سے ایک پتھر کی مار جتنا قریب کر دیا جائے۔ نبی کریم صلی اللہ تعالیٰ علیہ وآلہ وسلم نے ارشاد فرمایا: اگر میں وہاں ہوتا تو تمہیں ان کی قبر دکھاتا، سرخ ریت کے ٹیلے کے پاس راستے کے کنارے ہے۔