اردو ترجمہ

ہم سے اصبغ (بن فرج) نے بیان کیا، ان سے عبداللہ بن وہب نے بیان کیا، فرمایا مجھے عمرو (بن حارث) نے خبر دی، ان سے سعید بن حارث انصاری نے اور ان سے حضرت عبداللہ بن عمر رضی اللہ تعالیٰ عنہما نے فرمایا: حضرت سعد بن عبادہ رضی اللہ تعالیٰ عنہ بیمار ہوئے۔ نبی کریم صلی اللہ تعالیٰ علیہ وآلہ وسلم حضرت عبدالرحمٰن بن عوف، حضرت سعد بن ابی وقاص اور حضرت عبداللہ بن مسعود رضی اللہ تعالیٰ عنہم کے ساتھ ان کی عیادت کے لیے تشریف لے گئے۔ جب آپ صلی اللہ تعالیٰ علیہ وآلہ وسلم اندر داخل ہوئے تو انہیں تیمارداروں کے ہجوم میں پایا اور پوچھا: کیا وفات ہو گئی؟ لوگوں نے عرض کیا: نہیں، یا رسول اللہ! نبی کریم صلی اللہ تعالیٰ علیہ وآلہ وسلم (ان کی حالت دیکھ کر) رو پڑے۔ لوگوں نے رسول اللہ صلی اللہ تعالیٰ علیہ وآلہ وسلم کو روتے دیکھا تو وہ سب بھی رونے لگے۔ آپ صلی اللہ تعالیٰ علیہ وآلہ وسلم نے ارشاد فرمایا: سنو! اللہ تعالیٰ آنکھ کے آنسو پر عذاب نہیں دیتا اور نہ دل کے غم پر، بلکہ عذاب اس کی وجہ سے ہوتا ہے — آپ نے زبان کی طرف اشارہ فرمایا — اور رحمت بھی اسی (زبان) کی وجہ سے ہوتی ہے۔ اور میت کو اس کے گھر والوں کے نوحے و ماتم کی وجہ سے عذاب ہوتا ہے۔ حضرت عمر رضی اللہ تعالیٰ عنہ (اس معاملے میں) نوحہ کرنے والوں کو ڈنڈے سے مارتے، پتھر پھینکتے اور ان کے منہ میں مٹی ڈال دیتے تھے۔