الترجمة الأردية

حضرت ابن عباس رضی اللہ تعالیٰ عنہما فرماتے ہیں: رسول اللہ صلی اللہ تعالیٰ علیہ وآلہ وسلم نے ہمیں نصیحت فرماتے ہوئے کھڑے ہو کر ارشاد فرمایا: اے لوگو! تمہیں اللہ تعالیٰ کے پاس ننگے پاؤں، ننگے بدن اور بغیر ختنے کے جمع کیا جائے گا۔ "جیسے ہم نے پہلی بار پیدا کیا ویسے ہی دوبارہ بنائیں گے، یہ ہمارا وعدہ ہے اور ہم ضرور کرنے والے ہیں" (الانبیاء: 104)۔ سنو! قیامت کے دن سب سے پہلے جسے کپڑا پہنایا جائے گا وہ حضرت ابراہیم علیہ السلام ہوں گے۔ اور سنو! میری امت کے کچھ لوگوں کو بائیں طرف لے جایا جائے گا۔ میں کہوں گا: اے میرے رب! یہ میرے ساتھی ہیں۔ کہا جائے گا: تجھے نہیں معلوم تیرے بعد انہوں نے کیا نئی باتیں ایجاد کیں۔ میں وہی کہوں گا جو اللہ کے نیک بندے (حضرت عیسیٰ علیہ السلام) نے کہا: "جب تک میں ان میں رہا ان پر نگران رہا، جب تو نے مجھے اٹھا لیا تو تو ہی ان کا نگران تھا" (المائدہ: 117)۔ مجھ سے کہا جائے گا: جب تو نے انہیں چھوڑا اس وقت سے یہ لوگ مسلسل مرتد ہوتے رہے۔ (متفق علیہ)