الترجمة الأردية

ہم سے قتیبہ بن سعید، حضرت ابو بکر بن ابی شیبہ اور اسحاق بن ابراہیم نے بیان کیا، ان سب نے جریر سے روایت کی — حضرت ابو بکر نے کہا: ہم سے جریر بن عبد الحمید نے بیان کیا — موسیٰ بن ابی حضرت اُمّ المؤمنین عائشہ سے، انہوں نے سعید بن جبیر رحمۃ اللہ تعالیٰ علیہ سے، انہوں نے حضرت ابن عباس رضی اللہ تعالیٰ عنہما سے اللہ تعالیٰ کے فرمان: ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ ''آپ اس کے ساتھ اپنی زبان کو حرکت نہ دیں تاکہ اسے جلدی حاصل کر لیں'' کے بارے میں روایت بیان کی، فرمایا: جب حضرت جبرائیل علیہ السلام نبی کریم صلی اللہ تعالیٰ علیہ وآلہ وسلم کے پاس وحی لے کر تشریف لاتے تو آپ (اسے یاد کرنے کے لیے ساتھ ساتھ) اپنی زبان اور ہونٹوں کو حرکت دیتے تھے، ایسا کرنا آپ پر گراں گزرتا تھا اور یہ آپ (کے چہرۂ مبارک) سے معلوم ہو جاتا۔ اس پر اللہ تعالیٰ نے یہ آیات نازل فرمائیں: ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ ''آپ اس (وحی) کے لیے اپنی زبان کو نہ ہلائیں کہ اسے جلد سیکھ لیں'' ﴿إِنَّ عَلَيْنَا جَمْعَهُ وَقُرْآنَهُ﴾ ''بلاشبہ ہمارا ذمہ ہے اسے جمع کرنا اور اس کی قراءت'' یعنی ہمارا ذمہ ہے کہ اسے آپ کے سینۂ مبارک میں جمع فرمائیں اور اس کی قراءت (بھی ہمارے ذمے ہے) تاکہ آپ اس کی قراءت فرمائیں۔ ﴿فَإِذَا قَرَأْنَاهُ فَاتَّبِعْ قُرْآنَهُ﴾ ''پھر جب ہم اسے پڑھیں (فرشتہ ہماری طرف سے تلاوت کرے) تو آپ اس کی قراءت کی اتباع فرمائیں'' فرمایا: یعنی جب ہم اسے نازل کریں تو آپ اسے غور سے سنیں۔ ﴿ثُمَّ إِنَّ عَلَيْنَا بَيَانَهُ﴾ ''پھر بلاشبہ ہمارے ذمے ہے اس کا بیان'' یعنی آپ کی زبان سے (لوگوں کے سامنے) بیان فرما دینا۔ پھر (اس کے بعد) جب حضرت جبرائیل علیہ السلام آپ کے پاس (وحی لے کر) تشریف لاتے تو آپ سر جھکا کر غور سے سنتے اور جب وہ تشریف لے جاتے تو اللہ تعالیٰ کے وعدے کے مطابق آپ اس کی قراءت فرماتے۔