الترجمة الأردية

ہم سے محمد بن بشار نے بیان کیا، کہا کہ ہم سے جعفر بن عون نے بیان کیا، ان سے ابوالعمیس عتبہ بن عبداللہ نے بیان کیا، ان سے عون بن ابی جحیفہ نے اور ان سے ان کے والد (حضرت وہب بن عبداللہ رضی اللہ تعالیٰ عنہ) نے فرمایا کہ رسول اللہ صلی اللہ تعالیٰ علیہ وآلہ وسلم نے حضرت سلمان اور حضرت ابوالدرداء رضی اللہ تعالیٰ عنہما میں (ہجرت کے بعد) بھائی چارہ قائم فرمایا تھا۔ ایک مرتبہ حضرت سلمان رضی اللہ تعالیٰ عنہ حضرت ابوالدرداء رضی اللہ تعالیٰ عنہ سے ملاقات کے لیے گئے تو (ان کی اہلیہ) حضرت ام الدرداء رضی اللہ تعالیٰ عنہا کو بہت پراگندہ حال میں دیکھا۔ ان سے پوچھا کہ یہ حالت کیوں بنا رکھی ہے؟ حضرت ام الدرداء رضی اللہ تعالیٰ عنہا نے جواب دیا کہ تمہارے بھائی حضرت ابوالدرداء رضی اللہ تعالیٰ عنہ ہیں، جنہیں دنیا کی کوئی حاجت نہیں ہے۔ پھر حضرت ابوالدرداء رضی اللہ تعالیٰ عنہ بھی آ گئے اور ان کے سامنے کھانا حاضر کیا اور کہا: کھاؤ! انہوں نے فرمایا: میں تو روزے سے ہوں۔ حضرت سلمان رضی اللہ تعالیٰ عنہ نے فرمایا: میں بھی اس وقت تک کھانا نہیں کھاؤں گا جب تک تم خود بھی شریک نہ ہو گے۔ راوی نے بیان کیا کہ پھر وہ کھانے میں شریک ہو گئے (اور روزہ توڑ دیا)۔ رات ہوئی تو حضرت ابوالدرداء رضی اللہ تعالیٰ عنہ عبادت کے لیے اٹھے تو حضرت سلمان رضی اللہ تعالیٰ عنہ نے فرمایا: ابھی سو جاؤ۔ وہ سو گئے، پھر اٹھے تو حضرت سلمان رضی اللہ تعالیٰ عنہ نے پھر فرمایا: ابھی سو جاؤ۔ پھر جب رات کا آخری حصہ ہوا تو حضرت سلمان رضی اللہ تعالیٰ عنہ نے فرمایا: اچھا اب اٹھ جاؤ۔ چنانچہ دونوں نے نماز پڑھی۔ اس کے بعد حضرت سلمان رضی اللہ تعالیٰ عنہ نے فرمایا: تمہارے رب کا بھی تم پر حق ہے، تمہاری جان کا بھی تم پر حق ہے اور تمہاری بیوی کا بھی تم پر حق ہے، اس لیے ہر حق والے کا حق ادا کرنا چاہیے۔ پھر آپ نبی کریم صلی اللہ تعالیٰ علیہ وآلہ وسلم کی خدمت میں حاضر ہوئے اور آپ صلی اللہ تعالیٰ علیہ وآلہ وسلم سے اس کا تذکرہ کیا۔ آپ صلی اللہ تعالیٰ علیہ وآلہ وسلم نے ارشاد فرمایا: حضرت سلمان نے سچ کہا۔