الترجمة الأردية

ہم سے سعید بن ابی مریم نے بیان کیا، کہا کہ ہم سے عبداللہ بن وہب نے بیان کیا، کہا کہ مجھے یونس بن یزید نے خبر دی، انہیں زہری نے، انہیں سالم بن حضرت عبداللہ بن عمر نے، انہیں ان کے والد رضی اللہ تعالیٰ عنہ نے بیان کیا کہ نبی کریم صلی اللہ تعالیٰ علیہ وآلہ وسلم نے ارشاد فرمایا: وہ زمین جسے آسمان (بارش کا پانی) یا چشمہ سیراب کرتا ہو یا وہ خود بخود نمی سے سیراب ہو جاتی ہو تو اس کی پیداوار سے دسواں حصہ لیا جائے اور وہ زمین جسے کنویں سے پانی کھینچ کر سیراب کیا جاتا ہو تو اس کی پیداوار سے بیسواں حصہ لیا جائے۔ ابوعبداللہ (امام بخاری رحمۃ اللہ تعالیٰ علیہ) نے فرمایا: یہ حدیث، یعنی حضرت عبداللہ بن عمر رضی اللہ تعالیٰ عنہما کی حدیث کہ جس کھیتی میں آسمان کا پانی دیا جائے دسواں حصہ ہے، پہلی حدیث (یعنی حضرت ابو سعید رضی اللہ تعالیٰ عنہ کی حدیث) کی تفسیر ہے۔ اس میں زکوٰۃ کی کوئی مقدار مذکور نہیں ہے اور اس میں مذکور ہے۔ اور زیادتی قبول کی جاتی ہے اور گول مول حدیث کا حکم صاف صاف حدیث کے موافق لیا جاتا ہے جب اس کا راوی ثقہ ہو۔ جیسے حضرت فضل بن عباس رضی اللہ تعالیٰ عنہ نے روایت کیا کہ نبی کریم صلی اللہ تعالیٰ علیہ وآلہ وسلم نے کعبہ میں نماز نہیں پڑھی، لیکن حضرت بلال رضی اللہ تعالیٰ عنہ نے بتایا کہ آپ صلی اللہ تعالیٰ علیہ وآلہ وسلم نے نماز (کعبہ میں) پڑھی تھی، اس موقع پر بھی حضرت بلال رضی اللہ تعالیٰ عنہ کی بات قبول کی گئی اور حضرت فضل رضی اللہ تعالیٰ عنہ کا قول چھوڑ دیا گیا۔