الترجمة الأردية

ہم سے یحییٰ بن بکیر نے بیان کیا، مجھ سے لیث بن سعد نے بیان کیا، ان سے عقیل نے، ان سے ابن شہاب نے، ان سے عبیداللہ بن عبداللہ نے، ان سے حضرت ابن عباس رضی اللہ تعالیٰ عنہما نے اور ان سے حضرت عمر بن خطاب رضی اللہ تعالیٰ عنہ نے روایت فرمایا کہ جب عبداللہ بن ابی ابن سلول مر گیا تو رسول اللہ صلی اللہ تعالیٰ علیہ وآلہ وسلم سے اس کی نماز جنازہ پڑھانے کی درخواست کی گئی۔ جب رسول اللہ صلی اللہ تعالیٰ علیہ وآلہ وسلم نماز کے لیے کھڑے ہوئے تو میں جلدی سے آپ صلی اللہ تعالیٰ علیہ وآلہ وسلم کے سامنے آیا اور عرض کیا: یا رسول اللہ! آپ ابن ابی کی نماز جنازہ پڑھاتے ہیں حالانکہ اس نے فلاں دن فلاں بات کہی تھی اور فلاں دن فلاں بات — میں اس کی باتیں گن گن کر سنانے لگا۔ رسول اللہ صلی اللہ تعالیٰ علیہ وآلہ وسلم تبسم فرمانے لگے اور ارشاد فرمایا: عمر! پیچھے ہو جاؤ۔ جب میں بار بار عرض کرتا رہا تو آپ صلی اللہ تعالیٰ علیہ وآلہ وسلم نے ارشاد فرمایا: مجھے (اللہ تعالیٰ کی طرف سے) اختیار دیا گیا ہے اور میں نے (نماز پڑھانا) اختیار کیا ہے۔ اگر مجھے معلوم ہو کہ ستر بار سے زیادہ استغفار کرنے پر اسے بخش دیا جائے گا تو میں ستر سے بھی زیادہ بار مغفرت مانگوں۔ حضرت عمر رضی اللہ تعالیٰ عنہ نے فرمایا: پس رسول اللہ صلی اللہ تعالیٰ علیہ وآلہ وسلم نے اس کی نماز جنازہ پڑھائی اور واپس تشریف لے آئے۔ تھوڑی ہی دیر بعد سورۃ براءت کی یہ دو آیتیں نازل ہوئیں: «ولا تصل على أحد منهم مات أبدا» سے «وهم فاسقون» تک (ان میں سے کسی کی موت پر آپ ہرگز نماز نہ پڑھیے اور نہ ان کی قبر پر کھڑے ہوں)۔ حضرت عمر رضی اللہ تعالیٰ عنہ نے فرمایا: بعد میں مجھے رسول اللہ صلی اللہ تعالیٰ علیہ وآلہ وسلم کے حضور اس دن اپنی جرأت پر تعجب ہوتا رہا۔ اللہ اور اس کے رسول ہی بہتر جانتے ہیں۔