اردو ترجمہ

حضرت ابوسلمہ بن عبدالرحمٰن کہتے ہیں کہ حضرت ابن عباس رضی اللہ تعالیٰ عنہما سے ایسی عورت کے متعلق پوچھا گیا جس نے اپنے شوہر کے انتقال کے بیس رات بعد بچہ جنا، کیا اس کے لیے نکاح کر لینا جائز و درست ہو گا؟ انہوں نے کہا: اس وقت تک نہیں جب تک کہ دونوں عدتوں میں سے بعد میں مکمل ہونے والی عدت کو پوری نہ کر لے۔ حضرت ابوسلمہ فرماتے ہیں: میں نے کہا: اللہ تبارک وتعالیٰ فرماتا ہے: «وأولات الأحمال أجلهن أن يضعن حملهن» یعنی ”جن کے پیٹ میں بچہ ہے ان کی عدت یہ ہے کہ بچہ جن دیں“۔ حضرت ابن عباس رضی اللہ تعالیٰ عنہما نے کہا: یہ حکم مطلقہ ( حاملہ ) کا ہے۔ حضرت ابوہریرہ رضی اللہ تعالیٰ عنہ نے کہا: میں اپنے بھتیجے حضرت ابوسلمہ کے ساتھ ہوں ( یعنی حضرت ابوسلمہ جو کہتے ہیں وہی میرے نزدیک بھی صحیح اور بہتر ہے ) اس گفتگو کے بعد حضرت ابن عباس رضی اللہ تعالیٰ عنہما نے اپنے غلام کریب کو بھیجا کہ حضرت اُمّ المؤمنین ام سلمہ رضی اللہ تعالیٰ عنہا کے پاس جاؤ اور ان سے پوچھو کہ کیا اس سلسلے میں بھی رسول اللہ صلی اللہ تعالیٰ علیہ وآلہ وسلم کی کوئی سنت موجود ہے؟ کریب ان کے پاس آئے اور انہیں ( ساری بات ) بتائی، تو انہوں نے کہا: ہاں، سبیعہ اسلمی رضی اللہ تعالیٰ عنہا نے اپنے شوہر کے انتقال کے بعد کی بیس راتیں گزرنے کے بعد بچہ جنا اور رسول اللہ صلی اللہ تعالیٰ علیہ وآلہ وسلم نے اسے شادی کرنے کی اجازت دی، اور ابوسنابل رضی اللہ تعالیٰ عنہ انہیں لوگوں میں سے تھے جن ہوں نے اسے شادی کا پیغام دیا تھا۔