اردو ترجمہ

سیدنا ابو موسیٰ رضی اللہ عنہ روایت کرتے ہیں کہ رسول اللہصلی اللہ علیہ وسلمسے کچھ ایسی باتیں دریافت کی گئیں کہ آپصلی اللہ علیہ وسلمکو برا معلوم ہوا اور جب (اس قسم کے سوالات کی) آپصلی اللہ علیہ وسلمپر بہت زیادتی کی گئی تو آپصلی اللہ علیہ وسلمکو غصہ آ گیا۔ پھر آپصلی اللہ علیہ وسلمنے لوگوں سے فرمایا:”(اچھا اب) مجھ سے جو چاہو پوچھو۔“تو ایک شخص نے دریافت کیا کہ میرا باپ کون ہے؟ آپصلی اللہ علیہ وسلمنے فرمایا:”تیرا باپ حذافہ ہے۔“پھر دوسرا آدمی کھڑا ہوا اور اس نے پوچھا کہ یا رسول اللہ! میرا باپ کون ہے؟ آپصلی اللہ علیہ وسلمنے فرمایا:”تیرا باپ سالم، شیبہ کا آزاد کردہ غلام ہے۔“آخر سیدنا عمر رضی اللہ عنہ نے آپصلی اللہ علیہ وسلمکے چہرہ مبارک کا حال دیکھا تو عرض کی: یا رسول اللہ! ہم (ان باتوں کے دریافت کرنے سے جو آپ کو ناگوار ہوں) اللہ عزوجل سے توبہ کرتے ہیں۔[اللؤلؤ والمرجان/كتاب الفضائل/حدیث: 1524]