اردو ترجمہ

ہم سے سلیمان بن حرب نے بیان کیا، کہا ہم سے حماد یعنی ابن زید نے بیان کیا، ان سے یحییٰ بن سعید نے، ان سے بشیر بن یسار مولیٰ انصار نے بیان کیا، ان سے حضرت رافع بن خدیج رضی اللہ تعالیٰ عنہ اور حضرت سہل بن ابی حثمہ رضی اللہ تعالیٰ عنہ نے بیان کیا کہ حضرت عبداللہ بن سہل رضی اللہ تعالیٰ عنہ اور حضرت محیصہ بن مسعود رضی اللہ تعالیٰ عنہ خیبر گئے اور کھجوروں کے باغ میں الگ الگ ہو گئے تو حضرت عبداللہ بن سہل رضی اللہ تعالیٰ عنہ قتل کر دیے گئے۔ پھر حضرت عبدالرحمٰن بن سہل رضی اللہ تعالیٰ عنہ اور حویصہ اور محیصہ ابنائے مسعود نبی کریم صلی اللہ تعالیٰ علیہ وآلہ وسلم کی خدمت میں آئے اور اپنے ساتھی کے بارے میں بات کی۔ حضرت عبدالرحمٰن رضی اللہ تعالیٰ عنہ جو سب سے چھوٹے تھے پہلے بولنے لگے تو نبی کریم صلی اللہ تعالیٰ علیہ وآلہ وسلم نے ارشاد فرمایا "بڑے کو پہلے بولنے دو۔" یحییٰ نے کہا یعنی بات بڑے کو کرنی چاہیے۔ پھر انہوں نے اپنے ساتھی کے بارے میں بات کی تو نبی کریم صلی اللہ تعالیٰ علیہ وآلہ وسلم نے ارشاد فرمایا "کیا تم میں سے پچاس آدمی قسم کھا کر اپنے مقتول کا حق حاصل کرو گے؟" انہوں نے عرض کیا یا رسول اللہ! یہ ایسا معاملہ ہے جو ہم نے نہیں دیکھا۔ آپ صلی اللہ تعالیٰ علیہ وآلہ وسلم نے ارشاد فرمایا "تو کیا یہود تم سے اپنی پچاس قسموں سے بری ہو جائیں؟" انہوں نے عرض کیا یا رسول اللہ! وہ تو کافر لوگ ہیں (ان کی قسم کا کیا اعتبار)۔ پھر رسول اللہ صلی اللہ تعالیٰ علیہ وآلہ وسلم نے خود اپنی طرف سے ان کی دیت ادا فرمائی۔ حضرت سہل رضی اللہ تعالیٰ عنہ نے بیان کیا کہ میں نے ان اونٹوں میں سے ایک اونٹنی پائی جو ان کے باڑے میں آ گئی تھی اور اس نے مجھے اپنے پاؤں سے ٹھوکر ماری۔