اردو ترجمہ

ہم سے علی بن عبداللہ نے بیان کیا، انہوں نے فرمایا مجھ سے یحییٰ بن سعید نے بیان کیا، ان سے فضیل بن غزوان نے بیان کیا، ان سے عکرمہ نے بیان کیا اور ان سے حضرت عبداللہ بن عباس رضی اللہ تعالیٰ عنہما نے فرمایا کہ دسویں تاریخ کو رسول اللہ صلی اللہ تعالیٰ علیہ وآلہ وسلم نے منیٰ میں خطبہ ارشاد فرمایا، آپ صلی اللہ تعالیٰ علیہ وآلہ وسلم نے ارشاد فرمایا: اے لوگو! آج کون سا دن ہے؟ لوگوں نے عرض کیا: یہ حرمت کا دن ہے، آپ صلی اللہ تعالیٰ علیہ وآلہ وسلم نے ارشاد فرمایا: اور یہ شہر کون سا ہے؟ لوگوں نے عرض کیا: یہ حرمت کا شہر ہے، آپ صلی اللہ تعالیٰ علیہ وآلہ وسلم نے ارشاد فرمایا: یہ مہینہ کون سا ہے؟ لوگوں نے عرض کیا: یہ حرمت کا مہینہ ہے، آپ صلی اللہ تعالیٰ علیہ وآلہ وسلم نے ارشاد فرمایا: بس تمہارا خون تمہارے مال اور تمہاری عزتیں ایک دوسرے پر اسی طرح حرام ہیں جیسے اس دن کی حرمت اس شہر اور اس مہینے میں ہے، آپ صلی اللہ تعالیٰ علیہ وآلہ وسلم نے اس کلمہ کو کئی بار دہرایا، پھر سر مبارک اوپر اٹھا کر ارشاد فرمایا: اے اللہ! کیا میں نے (تیرا پیغام) پہنچا دیا! اے اللہ! کیا میں نے پہنچا دیا! حضرت عبداللہ بن عباس رضی اللہ تعالیٰ عنہما نے فرمایا: اس ذات کی قسم جس کے ہاتھ میں میری جان ہے! نبی کریم صلی اللہ تعالیٰ علیہ وآلہ وسلم کی یہ وصیت اپنی تمام امت کے لیے ہے، لہٰذا حاضر (اور جاننے والے) غائب (اور ناواقف لوگوں کو اللہ کا پیغام) پہنچا دیں۔ آپ صلی اللہ تعالیٰ علیہ وآلہ وسلم نے پھر ارشاد فرمایا: دیکھو میرے بعد ایک دوسرے کی گردن مار کر کافر نہ بن جانا۔