اردو ترجمہ

ہم سے سعید بن یحییٰ بن سعید نے بیان کیا، ان سے ان کے والد نے بیان کیا، ان سے ابن جریج نے بیان کیا، ان سے زہری نے بیان کیا، ان سے عیسیٰ بن حضرت طلحہ نے اور ان سے حضرت عبداللہ بن حضرت عمرو بن العاص رضی اللہ تعالیٰ عنہما نے فرمایا کہ جب رسول اللہ صلی اللہ تعالیٰ علیہ وآلہ وسلم دسویں تاریخ کو منیٰ میں خطبہ ارشاد فرما رہے تھے تو وہ وہاں موجود تھے۔ ایک شخص نے اس وقت کھڑے ہو کر عرض کیا کہ میں اس خیال میں تھا کہ فلاں کام فلاں سے پہلے ہے، پھر دوسرا کھڑا ہوا اور عرض کیا کہ میرا خیال تھا کہ فلاں کام فلاں سے پہلے ہے، چنانچہ میں نے قربانی سے پہلے سر منڈا لیا، رمی جمار سے پہلے قربانی کر لی، اور اسی طرح کے اور سوالات بھی ہوئے۔ تو نبی کریم صلی اللہ تعالیٰ علیہ وآلہ وسلم نے ارشاد فرمایا: اب کر لو، ان سب میں کوئی حرج نہیں۔ اسی طرح کے دوسرے سوالات بھی آپ صلی اللہ تعالیٰ علیہ وآلہ وسلم سے کیے گئے، آپ صلی اللہ تعالیٰ علیہ وآلہ وسلم نے ان سب کے جواب میں یہی ارشاد فرمایا کہ کوئی حرج نہیں اب کر لو۔