اردو ترجمہ

ہم سے عبداللہ بن یوسف نے بیان کیا، کہا ہم کو امام مالک رحمۃ اللہ تعالیٰ علیہ نے خبر دی، انہیں یحییٰ بن سعید نے، ان سے عمرہ بنت عبدالرحمٰن نے بیان فرمایا کہ میں نے حضرت حضرت اُمّ المؤمنین عائشہ صدیقہ رضی اللہ تعالیٰ عنہا سے سنا، انہوں نے فرمایا کہ ہم رسول اللہ صلی اللہ تعالیٰ علیہ وآلہ وسلم کے ساتھ (حج کے لیے) تشریف لے گئے تو ذی قعدہ میں سے پانچ دن باقی رہے تھے، ہم صرف حج کا ارادہ لے کر تشریف لے گئے تھے، جب ہم مکہ مکرمہ کے قریب تشریف لائے تو رسول اللہ صلی اللہ تعالیٰ علیہ وآلہ وسلم نے حکم فرمایا کہ جن لوگوں کے ساتھ قربانی نہ ہو وہ جب طواف فرما لیں اور صفا و مروہ کی سعی بھی فرما لیں تو حلال ہو جائیں۔ حضرت اُمّ المؤمنین عائشہ رضی اللہ تعالیٰ عنہا نے فرمایا کہ قربانی کے دن ہمارے گھر گائے کا گوشت لایا گیا تو میں نے عرض کیا کہ یہ کیا ہے؟ (لانے والے نے عرض کیا) کہ رسول اللہ صلی اللہ تعالیٰ علیہ وآلہ وسلم نے اپنی ازواج مطہرات کی طرف سے یہ قربانی فرمائی ہے۔ یحییٰ نے فرمایا کہ میں نے عمرہ کی یہ حدیث قاسم سے بیان فرمائی تو انہوں نے فرمایا: عمرہ نے یہ حدیث ٹھیک ٹھیک بیان فرمائی ہے۔