اردو ترجمہ

ہم سے ابوالیمان نے بیان کیا، انہوں نے کہا کہ ہمیں شعیب نے زہری سے خبر دی، حضرت عروہ رحمۃ اللہ تعالیٰ علیہ نے فرمایا کہ میں نے حضرت اُمّ المؤمنین عائشہ صدیقہ رضی اللہ تعالیٰ عنہا سے پوچھا کہ اللہ تعالیٰ کے اس ارشاد کے بارے میں آپ کا کیا خیال ہے (جو سورۃ البقرہ میں ہے) کہ «إِنَّ الصَّفَا وَالْمَرْوَةَ مِنْ شَعَائِرِ اللَّهِ فَمَنْ حَجَّ الْبَيْتَ أَوِ اعْتَمَرَ فَلاَ جُنَاحَ عَلَيْهِ أَنْ يَطَّوَّفَ بِهِمَا» (صفا اور مروہ اللہ تعالیٰ کی نشانیوں میں سے ہیں، اس لیے جو بیت اللہ کا حج یا عمرہ کرے اس کے لیے ان کا طواف کرنے میں کوئی گناہ نہیں)۔ قسم اللہ کی! پھر تو کوئی حرج نہ ہونا چاہیے اگر کوئی صفا اور مروہ کی سعی نہ کرے۔ حضرت اُمّ المؤمنین عائشہ صدیقہ رضی اللہ تعالیٰ عنہا نے فرمایا کہ بھتیجے! تم نے بری بات کہی۔ اللہ کا مطلب یہ ہوتا تو قرآن میں یوں اترتا «لاَ جُنَاحَ عَلَيْهِ أَنْ لاَ يَتَطَوَّفَ بِهِمَا» (ان کا طواف نہ کرنے میں کوئی گناہ نہیں)۔ بات یہ ہے کہ یہ آیت تو انصار کے لیے اتری تھی جو اسلام سے پہلے منات بت کے نام پر، جو مشلل میں رکھا ہوا تھا اور جس کی وہ پوجا کیا کرتے تھے، احرام باندھتے تھے۔ یہ لوگ جب (زمانۂ جاہلیت میں) احرام باندھتے تو صفا مروہ کی سعی کو اچھا نہیں جانتے تھے۔ اب جب مسلمان ہوئے تو رسول اللہ صلی اللہ تعالیٰ علیہ وآلہ وسلم سے اس کے متعلق عرض کیا اور کہا کہ یا رسول اللہ! ہم صفا اور مروہ کی سعی اچھی نہیں سمجھتے تھے۔ اس پر اللہ تعالیٰ نے یہ آیت نازل فرمائی کہ صفا اور مروہ دونوں اللہ کی نشانیاں ہیں۔ حضرت اُمّ المؤمنین عائشہ صدیقہ رضی اللہ تعالیٰ عنہا نے فرمایا کہ رسول اللہ صلی اللہ تعالیٰ علیہ وآلہ وسلم نے ان دو پہاڑوں کے درمیان سعی کی سنت جاری فرمائی ہے، اس لیے کسی کے لیے مناسب نہیں کہ اسے ترک کر دے۔ پھر میں نے اس کا ذکر حضرت ابوبکر بن عبدالرحمٰن سے کیا تو انہوں نے فرمایا کہ میں نے تو یہ علمی بات اب تک نہیں سنی تھی بلکہ میں نے بہت سے اصحابِ علم سے تو یہ سنا ہے کہ وہ یوں فرماتے تھے کہ عرب کے لوگ ان لوگوں کے سوا جن کا حضرت اُمّ المؤمنین عائشہ صدیقہ رضی اللہ تعالیٰ عنہا نے ذکر فرمایا جو مناۃ کے لیے احرام باندھتے تھے، سب صفا مروہ کا پھیرا کیا کرتے تھے۔ اور جب اللہ نے قرآن کریم میں بیت اللہ کے طواف کا ذکر فرمایا اور صفا مروہ کا ذکر نہیں فرمایا تو لوگ عرض کرنے لگے یا رسول اللہ! ہم تو جاہلیت کے زمانے میں صفا اور مروہ کا پھیرا کیا کرتے تھے اور اب اللہ نے بیت اللہ کے طواف کا ذکر تو فرمایا لیکن صفا مروہ کا ذکر نہیں فرمایا، تو کیا صفا مروہ کی سعی کرنے میں ہم پر کچھ گناہ ہو گا؟ تب اللہ نے یہ آیت اتاری کہ صفا مروہ اللہ کی نشانیاں ہیں۔ حضرت ابوبکر نے فرمایا کہ میں سنتا ہوں کہ یہ آیت دونوں فریقوں کے بارے میں اتری ہے: یعنی اس فریق کے بارے میں جو جاہلیت میں صفا مروہ کا طواف برا جانتا تھا اور اس کے بارے میں جو جاہلیت میں صفا مروہ کا طواف کیا کرتا تھا، پھر مسلمان ہونے کے بعد اس لیے اسے برا سمجھنے لگا کہ اللہ نے بیت اللہ کے طواف کا ذکر فرمایا اور صفا مروہ کا نہیں۔ یہاں تک کہ اللہ نے بیت اللہ کے طواف کے بعد ان کے طواف کا بھی ذکر فرما دیا۔