اردو ترجمہ

ہم سے محمد بن یوسف فریابی نے بیان کیا، کہا کہ ہم سے سفیان ثوری نے بیان کیا، ان سے قیس بن مسلم نے، ان سے طارق بن شہاب نے اور ان سے حضرت ابوموسیٰ اشعری رضی اللہ تعالیٰ عنہ نے بیان کیا کہ نبی کریم صلی اللہ تعالیٰ علیہ وآلہ وسلم نے مجھے یمن میں میری قوم کے پاس بھیجا تھا۔ (حجۃ الوداع کے موقع پر) جب میں حاضر ہوا تو آپ صلی اللہ تعالیٰ علیہ وآلہ وسلم بطحاء میں تشریف فرما تھے۔ آپ صلی اللہ تعالیٰ علیہ وآلہ وسلم نے دریافت فرمایا: کس چیز کا احرام باندھا ہے؟ میں نے عرض کیا: وہی جو نبی کریم صلی اللہ تعالیٰ علیہ وآلہ وسلم نے باندھا ہے۔ آپ صلی اللہ تعالیٰ علیہ وآلہ وسلم نے پوچھا: تمہارے ساتھ قربانی ہے؟ میں نے عرض کیا: نہیں۔ تب آپ صلی اللہ تعالیٰ علیہ وآلہ وسلم نے حکم فرمایا تو میں نے بیت اللہ کا طواف اور صفا و مروہ کی سعی کی، پھر آپ صلی اللہ تعالیٰ علیہ وآلہ وسلم کے حکم سے میں نے احرام کھول دیا۔ پھر میں اپنی قوم کی ایک عورت کے پاس آیا اور اس نے میرا سر کنگھا کیا یا دھویا۔ جب حضرت عمر رضی اللہ تعالیٰ عنہ کا زمانہ آیا تو آپ نے فرمایا: اگر ہم اللہ کی کتاب کو لیں تو وہ حج اور عمرہ مکمل کرنے کا حکم دیتی ہے، اللہ تعالیٰ فرماتا ہے: «وَأَتِمُّوا الْحَجَّ وَالْعُمْرَةَ» (حج اور عمرہ اللہ کے لیے پورے کرو)۔ اور اگر ہم نبی کریم صلی اللہ تعالیٰ علیہ وآلہ وسلم کی سنت کو لیں تو آپ صلی اللہ تعالیٰ علیہ وآلہ وسلم نے قربانی سے فراغت تک احرام نہیں کھولا تھا۔