اردو ترجمہ

ہم سے یحییٰ بن بکیر نے بیان کیا، کہا کہ ہم سے لیث نے بیان کیا، عبیداللہ بن ابی جعفر سے، کہا کہ میں نے حمزہ بن حضرت عبداللہ بن عمر سے سنا، کہا کہ میں نے حضرت عبداللہ بن عمر رضی اللہ تعالیٰ عنہما سے سنا، انہوں نے فرمایا کہ نبی کریم صلی اللہ تعالیٰ علیہ وآلہ وسلم نے ارشاد فرمایا: آدمی برابر لوگوں سے مانگتا رہتا ہے، یہاں تک کہ قیامت کے دن اس حال میں آئے گا کہ اس کے چہرے پر گوشت کا ایک ٹکڑا بھی نہ ہو گا۔ اور ارشاد فرمایا کہ قیامت کے دن سورج اتنا قریب ہو جائے گا کہ پسینہ آدھے کان تک پہنچ جائے گا۔ پھر جب لوگ اس حال میں ہوں گے تو حضرت آدم علیہ السلام سے مدد مانگیں گے، پھر حضرت موسیٰ علیہ السلام سے، پھر حضرت محمد صلی اللہ تعالیٰ علیہ وآلہ وسلم سے۔ اور عبداللہ نے مزید بیان کیا کہ مجھ سے لیث نے بیان کیا، مجھ سے ابن ابی جعفر نے بیان کیا: پھر آپ صلی اللہ تعالیٰ علیہ وآلہ وسلم شفاعت فرمائیں گے تاکہ مخلوق کا فیصلہ ہو، پھر آپ صلی اللہ تعالیٰ علیہ وآلہ وسلم چل کر جنت کے دروازے کا کنڈا پکڑیں گے اور اس دن اللہ تعالیٰ آپ صلی اللہ تعالیٰ علیہ وآلہ وسلم کو مقامِ محمود پر فائز فرمائے گا جہاں تمام اہلِ محشر آپ صلی اللہ تعالیٰ علیہ وآلہ وسلم کی تعریف فرمائیں گے۔ اور معلیٰ نے بیان کیا، ہم سے وہیب نے نعمان بن راشد سے، انہوں نے عبداللہ بن مسلم سے جو زہری کے بھائی ہیں، انہوں نے حمزہ سے، انہوں نے حضرت ابن عمر رضی اللہ تعالیٰ عنہما سے، انہوں نے نبی کریم صلی اللہ تعالیٰ علیہ وآلہ وسلم سے سوال (بھیک مانگنے) کے بارے میں بیان کیا۔