اردو ترجمہ

ہم سے ابو معمر نے بیان کیا، کہا ہم سے عبدالوارث نے بیان کیا، کہا ہم سے کثیر بن شنظیر نے بیان کیا، ان سے عطاء بن ابی رباح نے اور ان سے حضرت جابر بن عبداللہ رضی اللہ تعالیٰ عنہما نے فرمایا کہ رسول اللہ صلی اللہ تعالیٰ علیہ وآلہ وسلم نے مجھے اپنے ایک کام سے (غزوۂ بنی مصطلق میں) بھیجا۔ میں گیا اور کام پورا کر کے واپس آیا۔ پھر نبی کریم صلی اللہ تعالیٰ علیہ وآلہ وسلم کی خدمت میں حاضر ہو کر سلام عرض کیا لیکن آپ صلی اللہ تعالیٰ علیہ وآلہ وسلم نے جواب نہیں دیا۔ میرے دل میں اللہ جانے کیا گزری اور میں نے دل میں سوچا کہ شاید رسول اللہ صلی اللہ تعالیٰ علیہ وآلہ وسلم مجھ سے اس لیے ناراض ہیں کہ میں نے دیر لگا دی۔ میں نے دوبارہ سلام عرض کیا لیکن اس بار بھی آپ صلی اللہ تعالیٰ علیہ وآلہ وسلم نے جواب نہیں دیا، تو میرے دل میں پہلے سے بھی زیادہ غم ہوا۔ پھر تیسری بار سلام عرض کیا تو آپ صلی اللہ تعالیٰ علیہ وآلہ وسلم نے جواب مرحمت فرمایا اور ارشاد فرمایا: پہلے دو بار مجھے جو جواب دینے سے رکاوٹ ہوئی وہ یہ تھی کہ میں نماز پڑھ رہا تھا۔ اور آپ صلی اللہ تعالیٰ علیہ وآلہ وسلم اس وقت اپنی سواری پر تشریف فرما تھے اور اس کا رخ قبلے کی طرف نہ تھا بلکہ دوسری سمت تھا۔