اردو ترجمہ

حضرت عدی بن حاتم رضی اللہ تعالیٰ عنہ سے روایت ہے، فرماتے ہیں کہ میں نے نبی کریم صلی اللہ تعالیٰ علیہ وآلہ وسلم سے بے پر کے تیر (مِعْرَاض) کے بارے میں دریافت کیا تو آپ نے ارشاد فرمایا: جب وہ اپنی تیز دھار سے لگے (یعنی شکار کے جسم میں گھس جائے) تو کھاؤ، اور جب چوڑائی سے لگے (یعنی گھسے نہیں بلکہ چوٹ سے مارے) تو مت کھاؤ کیونکہ وہ وقیذ (چوٹ کھا کر مرا ہوا) ہے۔ میں نے عرض کیا: میں اپنے کتے کو شکار پر چھوڑتا ہوں (اس کا کیا حکم ہے؟)۔ آپ صلی اللہ تعالیٰ علیہ وآلہ وسلم نے ارشاد فرمایا: جب بِسْمِ اللّٰہ پڑھ کر چھوڑو تو کھاؤ ورنہ مت کھاؤ، اور اگر کتے نے اس میں سے کھا لیا ہو تو مت کھاؤ کیونکہ اس نے اپنے لیے پکڑا ہے۔ پھر میں نے عرض کیا: میں اپنے کتے کو چھوڑتا ہوں تو دوسرا کتا بھی آ کر شامل ہو جاتا ہے (تب کیا کروں؟)۔ آپ صلی اللہ تعالیٰ علیہ وآلہ وسلم نے ارشاد فرمایا: مت کھاؤ کیونکہ تم نے بِسْمِ اللّٰہ صرف اپنے کتے پر پڑھی تھی۔