اردو ترجمہ

حضرت عبداللہ بن مسعود رضی اللہ تعالیٰ عنہ فرماتے ہیں کہ ہم ایک جمعہ کی رات مسجد میں تھے کہ اچانک انصار کا ایک شخص مسجد میں داخل ہوا اور کہنے لگا: اگر کوئی شخص اپنی بیوی کے ساتھ کسی اجنبی مرد کو پائے اور اس کا ذکر کرے تو تم لوگ اسے (تہمت کی) حد لگاؤ گے، یا اگر وہ اسے قتل کر دے تو تم اس کے بدلے میں اسے قتل کر دو گے، اور اگر وہ خاموش رہے تو غصے میں جلتا بھنتا رہے۔ اللہ کی قسم! میں اس بارے میں رسول اللہ صلی اللہ تعالیٰ علیہ وآلہ وسلم سے ضرور دریافت کروں گا۔ جب دوسرا دن ہوا تو وہ رسول اللہ صلی اللہ تعالیٰ علیہ وآلہ وسلم کی بارگاہ میں حاضر ہوا اور عرض کیا: اگر کوئی شخص اپنی بیوی کے ساتھ کسی اجنبی مرد کو پائے اور اس کا ذکر کرے تو آپ اسے حد لگائیں گے، یا وہ اسے قتل کرے تو آپ لوگ بدلے میں اسے قتل کر دیں گے، یا وہ خاموشی اختیار کر کے اندر ہی اندر جلتا رہے۔ آپ صلی اللہ تعالیٰ علیہ وآلہ وسلم نے دعا فرمائی: اے اللہ! (اس معاملے کا) فیصلہ فرما دے۔ آپ صلی اللہ تعالیٰ علیہ وآلہ وسلم دعا فرماتے رہے، چنانچہ لعان کی آیت نازل ہوئی: «وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلَّا أَنْفُسُهُمْ» (اور جو لوگ اپنی بیویوں پر تہمت لگائیں اور ان کے پاس اپنے سوا کوئی گواہ نہ ہو)۔ لوگوں میں سب سے پہلے یہی شخص اس آزمائش سے دوچار ہوا۔ وہ اور اس کی بیوی رسول اللہ صلی اللہ تعالیٰ علیہ وآلہ وسلم کی خدمت میں حاضر ہوئے اور دونوں نے لعان کیا۔ مرد نے چار مرتبہ اللہ کا نام لے کر اپنے سچا ہونے کی گواہی دی، پھر پانچویں مرتبہ اپنے اوپر اللہ کی لعنت مانگی اگر وہ جھوٹوں میں سے ہو۔ پھر وہ عورت لعان کرنے لگی تو نبی کریم صلی اللہ تعالیٰ علیہ وآلہ وسلم نے ارشاد فرمایا: ٹھہرو! لیکن اس نے نہ مانا اور لعان کر ہی لیا۔ جب دونوں پلٹے تو آپ صلی اللہ تعالیٰ علیہ وآلہ وسلم نے ارشاد فرمایا: شاید یہ عورت کالا گھنگریالے بالوں والا بچہ جنے۔ چنانچہ اس نے کالا گھنگریالے بالوں والا بچہ ہی جنا۔