Urdu Translation

سیدنا نواس بن سمعان رضی اللہ عنہ سے روایت ہے کہ رسول اللہصلی اللہ علیہ وسلمنے فرمایا:”اللہ تعالیٰ نے ایک مثال بیان فرمائی ہے کہ ایک سیدھا راستہ ہے جس کے دونوں کناروں پر دو دیواریں ہیں، ان میں کھلے ہوئے دروازے ہیں اور ان دروازوں پر پردے لٹکے ہوئے ہیں۔ اس راستے کے شروع میں ایک پکارنے والا پکار رہا ہے: اے لوگو! تم سب کے سب اس سیدھے راستے پر چلو اور ادھر ادھر نہ مڑو، اور ایک پکارنے والا اس راستے کے اوپر سے پکارتا ہے، پس جب تم میں سے کوئی ان (ممنوعہ) دروازوں میں سے کوئی دروازہ کھولنا چاہتا ہے تو وہ کہتا ہے: تیرا ناس جائے! اسے مت کھولنا، کیونکہ اگر تو نے اسے کھولا تو تو اس میں داخل ہو جائے گا۔ یہاں ’صراط‘ سے مراد اسلام ہے، ’دیواریں‘ اللہ کی حدود ہیں، ’کھلے ہوئے دروازے‘ اللہ کی حرام کردہ چیزیں ہیں، ’راستے کے سرے پر پکارنے والا‘ اللہ کی کتاب (قرآن) ہے، اور ’اوپر سے پکارنے والا‘ ہر مسلمان کے دل میں اللہ کی طرف سے موجود نصیحت کرنے والا (ضمیر) ہے۔“یہ حدیث امام مسلم کی شرط پر صحیح ہے، مجھے اس میں کوئی علت (نقص) معلوم نہیں ہوتی، لیکن شیخین نے اسے روایت نہیں کیا۔[المستدرك على الصحيحين/كتاب الإيمان/حدیث: 247]