Urdu Translation

(اسماعیل) ابن علیہ نے کہا: ہمیں یونس نے ابراہیم بن یزید تیمی رحمۃ اللہ تعالیٰ علیہ کے حوالے سے حدیث سنائی، میرے علم کے مطابق، انہوں نے یہ حدیث اپنے والد (یزید) رحمۃ اللہ تعالیٰ علیہ سے سنی اور انہوں نے حضرت ابو ذر رضی اللہ تعالیٰ عنہ سے روایت کی کہ رسول اللہ صلی اللہ تعالیٰ علیہ وآلہ وسلم نے ایک دن دریافت فرمایا: ''جانتے ہو یہ سورج کہاں جاتا ہے؟'' صحابہ رضی اللہ تعالیٰ عنہم نے عرض کیا: اللہ اور اس کے رسول بہتر جاننے والے ہیں۔ آپ صلی اللہ تعالیٰ علیہ وآلہ وسلم نے ارشاد فرمایا: ''یہ چلتا رہتا ہے یہاں تک کہ عرش کے نیچے اپنے مستقر پر پہنچ جاتا ہے، پھر سجدے میں چلا جاتا ہے، وہ مسلسل اسی حالت میں رہتا ہے حتیٰ کہ اسے کہا جاتا ہے: اٹھو اور جہاں سے آئے تھے وہاں لوٹ جاؤ، چنانچہ وہ واپس جاتا ہے اور اپنی مطلع سے طلوع ہوتا رہتا ہے، پھر چلتا ہے، پھر اپنے مستقر پر پہنچ کر عرش کے نیچے سجدے میں گر جاتا ہے اور مسلسل اسی حالت میں رہتا ہے حتیٰ کہ اسے کہا جاتا ہے: اٹھو اور جہاں سے آئے تھے وہاں لوٹ جاؤ، چنانچہ وہ لوٹ جاتا ہے اور اپنی مطلع سے طلوع ہوتا ہے، پھر چلتا ہے اور لوگوں کو کچھ محسوس نہیں ہوتا حتیٰ کہ وہ اپنے مستقر پر پہنچ جاتا ہے، یہ عرش الٰہی کے نیچے ہے۔ پھر اس سے کہا جائے گا: اٹھو اور جہاں سے غروب ہوئے تھے وہاں سے طلوع ہو جاؤ، چنانچہ وہ مغرب سے طلوع ہو گا۔'' رسول اللہ صلی اللہ تعالیٰ علیہ وآلہ وسلم نے ارشاد فرمایا: ''کیا تم جانتے ہو وہ وقت کب ہوگا؟ وہ اس وقت ہو گا جب کسی شخص کو اس کا ایمان فائدہ نہ دے گا جو پہلے ایمان نہ لایا ہو یا اپنے ایمان کے ذریعے کوئی نیکی نہ کمائی ہو۔''