Urdu Translation

ہم سے عبداللہ بن رجاء نے بیان کیا، کہا ہم سے اسرائیل بن یونس نے ابواسحاق سے بیان کیا، انہوں نے حضرت براء بن عازب رضی اللہ تعالیٰ عنہما سے، انہوں نے فرمایا کہ رسول اللہ صلی اللہ تعالیٰ علیہ وآلہ وسلم نے سولہ یا سترہ ماہ تک بیت المقدس کی طرف رخ کر کے نماز پڑھی اور رسول اللہ صلی اللہ تعالیٰ علیہ وآلہ وسلم کی دلی خواہش تھی کہ کعبۃ اللہ شریف کی طرف رخ کر کے نماز پڑھیں۔ تو اللہ تعالیٰ نے یہ آیت نازل فرمائی «قَدْ نَرَى تَقَلُّبَ وَجْهِكَ فِي السَّمَاءِ» (بے شک ہم آپ کا بار بار آسمان کی طرف چہرہ اٹھانا دیکھ رہے ہیں)۔ پس آپ صلی اللہ تعالیٰ علیہ وآلہ وسلم نے کعبہ شریف کی طرف رخ فرما لیا۔ اور بے وقوفوں نے، یعنی یہودیوں نے، کہنا شروع کیا کہ انہیں کس چیز نے اس قبلے سے پھیر دیا جس پر وہ (پہلے) تھے۔ (اللہ تعالیٰ نے ارشاد فرمایا) آپ فرما دیجیے کہ مشرق اور مغرب سب اللہ ہی کا ہے، وہ جسے چاہتا ہے سیدھے راستے کی ہدایت فرماتا ہے۔ پھر ایک شخص نے نبی کریم صلی اللہ تعالیٰ علیہ وآلہ وسلم کے ساتھ (نئے قبلے کی طرف) نماز پڑھی اور نماز کے بعد نکلا۔ وہ انصار کی ایک جماعت کے پاس سے گزرا جو عصر کی نماز بیت المقدس کی طرف منہ کر کے پڑھ رہے تھے۔ اس نے کہا کہ میں گواہی دیتا ہوں کہ میں نے رسول اللہ صلی اللہ تعالیٰ علیہ وآلہ وسلم کے ساتھ نماز پڑھی ہے اور آپ صلی اللہ تعالیٰ علیہ وآلہ وسلم نے کعبہ شریف کی طرف رخ فرمایا ہے۔ پس وہ جماعت (نماز ہی کی حالت میں) مڑ گئی اور کعبہ شریف کی طرف رخ کر لیا۔