Urdu Translation

ہم سے ابوالنعمان نے بیان کیا، کہا ہم سے حضرت ابوعوانہ نے بیان کیا، ان سے منصور نے، ان سے ابراہیم نخعی نے، ان سے اسود نے اور ان سے حضرت حضرت اُمّ المؤمنین عائشہ صدیقہ رضی اللہ تعالیٰ عنہا نے فرمایا کہ ہم نبی کریم صلی اللہ تعالیٰ علیہ وآلہ وسلم کے ساتھ نکلے، ہماری نیت حج کے سوا اور کچھ نہ تھی۔ پھر جب نبی کریم صلی اللہ تعالیٰ علیہ وآلہ وسلم (مکہ مکرمہ) تشریف لائے تو آپ صلی اللہ تعالیٰ علیہ وآلہ وسلم نے بیت اللہ کا طواف اور صفا اور مروہ کی سعی فرمائی، لیکن آپ صلی اللہ تعالیٰ علیہ وآلہ وسلم نے احرام نہیں کھولا کیونکہ آپ صلی اللہ تعالیٰ علیہ وآلہ وسلم کے ساتھ قربانی تھی۔ آپ صلی اللہ تعالیٰ علیہ وآلہ وسلم کے ساتھ آپ صلی اللہ تعالیٰ علیہ وآلہ وسلم کی ازواج مطہرات نے اور دیگر اصحاب نے بھی طواف فرمایا اور جن کے ساتھ قربانی نہیں تھی انہوں نے (اس طواف و سعی کے بعد) احرام کھول دیا، لیکن میں حائضہ ہو گئی تھی، سب نے اپنے حج کے تمام مناسک ادا فرما لیے، پھر جب لیلۃ الحصبہ یعنی روانگی کی رات آئی تو میں نے عرض کیا: یا رسول اللہ صلی اللہ تعالیٰ علیہ وآلہ وسلم! آپ صلی اللہ تعالیٰ علیہ وآلہ وسلم کے تمام ساتھی حج اور عمرہ دونوں کر کے جا رہے ہیں صرف میں عمرہ سے محروم ہوں، آپ صلی اللہ تعالیٰ علیہ وآلہ وسلم نے ارشاد فرمایا: اچھا جب ہم تشریف لائے تھے تو تم (حیض کی وجہ سے) بیت اللہ کا طواف نہیں کر سکی تھیں؟ میں نے عرض کیا: نہیں، آپ صلی اللہ تعالیٰ علیہ وآلہ وسلم نے ارشاد فرمایا: پھر اپنے بھائی کے ساتھ تنعیم تشریف لے جاؤ اور وہاں سے عمرہ کا احرام باندھو (اور عمرہ کرو)، ہم تمہارا فلاں جگہ انتظار کریں گے۔ چنانچہ میں اپنے بھائی (حضرت عبدالرحمٰن رضی اللہ تعالیٰ عنہ) کے ساتھ تنعیم گئی اور وہاں سے عمرہ کا احرام باندھا۔ اسی طرح حضرت اُمّ المؤمنین صفیہ بنت حیی رضی اللہ تعالیٰ عنہا بھی حائضہ ہو گئی تھیں، نبی کریم صلی اللہ تعالیٰ علیہ وآلہ وسلم نے انہیں (ازراہ محبت) ارشاد فرمایا: عقریٰ حلقیٰ! تو ہمیں روک لے گی، کیا تو نے قربانی کے دن طواف زیارت نہیں کیا تھا؟ وہ عرض کیا: کیا تھا۔ اس پر آپ صلی اللہ تعالیٰ علیہ وآلہ وسلم نے ارشاد فرمایا: پھر کوئی حرج نہیں، چلی چلو۔ جب میں آپ صلی اللہ تعالیٰ علیہ وآلہ وسلم تک پہنچی تو آپ صلی اللہ تعالیٰ علیہ وآلہ وسلم مکہ مکرمہ کے بالائی علاقے پر تشریف لے جا رہے تھے اور میں اتر رہی تھی یا یہ کہا کہ میں چڑھ رہی تھی اور نبی کریم صلی اللہ تعالیٰ علیہ وآلہ وسلم اتر رہے تھے۔ مسدد کی روایت میں (رسول اللہ صلی اللہ تعالیٰ علیہ وآلہ وسلم کے پوچھنے پر) ہاں کے بجائے نہیں ہے، اس کی متابعت جریر نے منصور کے واسطے سے 'نہیں' کے ذکر میں کی ہے۔