Urdu Translation

ہم سے حفص بن عمر نے بیان کیا، کہا ہم سے شعبہ نے بیان کیا، ان سے علقمہ بن مرثد نے، ان سے سعد بن عبیدہ نے اور ان سے حضرت براء بن عازب رضی اللہ تعالیٰ عنہما نے نبی کریم صلی اللہ تعالیٰ علیہ وآلہ وسلم سے روایت کیا کہ آپ صلی اللہ تعالیٰ علیہ وآلہ وسلم نے ارشاد فرمایا: جب مومن قبر میں بٹھایا جاتا ہے تو اس کے پاس (فرشتے) آتے ہیں، پھر وہ شہادت دیتا ہے کہ اللہ کے سوا کوئی معبود نہیں اور محمد (صلی اللہ تعالیٰ علیہ وآلہ وسلم) اللہ کے رسول ہیں۔ یہی اللہ تعالیٰ کے اس ارشاد کا مصداق ہے: «يثبت الله الذين آمنوا بالقول الثابت» (اللہ تعالیٰ ایمان والوں کو پختہ بات کے ذریعے مضبوط رکھتا ہے — سورۃ ابراہیم: 27)۔ (دوسری سند) ہم سے محمد بن بشار نے بیان کیا، کہا ہم سے غندر نے بیان کیا، کہا ہم سے شعبہ نے اسی طرح بیان کیا اور یہ اضافہ کیا کہ «يثبت الله الذين آمنوا» عذاب قبر کے بارے میں نازل ہوئی۔