Urdu Translation

ہم سے عبدان نے بیان کیا، کہا ہمیں عبداللہ بن مبارک رحمۃ اللہ تعالیٰ علیہ نے خبر دی، انہیں یونس نے، انہیں زہری نے خبر دی، کہا مجھے سالم بن عبداللہ نے خبر دی کہ حضرت ابن عمر رضی اللہ تعالیٰ عنہما نے انہیں بتایا کہ حضرت عمر رضی اللہ تعالیٰ عنہ نبی کریم صلی اللہ تعالیٰ علیہ وآلہ وسلم کے ہمراہ کچھ صحابہ کرام رضی اللہ تعالیٰ عنہم کے ساتھ ابن صیاد کی طرف گئے۔ انہوں نے اسے بنو مغالہ کے مکانات کے قریب بچوں کے ساتھ کھیلتے ہوئے پایا۔ ابن صیاد ان دنوں بلوغت کے قریب تھا۔ اسے خبر ہی نہ ہوئی یہاں تک کہ نبی کریم صلی اللہ تعالیٰ علیہ وآلہ وسلم نے اپنا دست مبارک اس پر رکھا۔ پھر آپ صلی اللہ تعالیٰ علیہ وآلہ وسلم نے ابن صیاد سے ارشاد فرمایا: کیا تم گواہی دیتے ہو کہ میں اللہ کا رسول ہوں؟ ابن صیاد نے آپ صلی اللہ تعالیٰ علیہ وآلہ وسلم کی طرف دیکھا اور بولا: میں گواہی دیتا ہوں کہ آپ ان پڑھوں (امیوں) کے رسول ہیں۔ پھر ابن صیاد نے نبی کریم صلی اللہ تعالیٰ علیہ وآلہ وسلم سے پوچھا: کیا آپ گواہی دیتے ہیں کہ میں اللہ کا رسول ہوں؟ آپ صلی اللہ تعالیٰ علیہ وآلہ وسلم نے اس بات کو ٹھکرا دیا اور ارشاد فرمایا: میں اللہ اور اس کے رسولوں پر ایمان لایا۔ پھر آپ صلی اللہ تعالیٰ علیہ وآلہ وسلم نے اس سے دریافت فرمایا: تجھے کیا دکھائی دیتا ہے؟ ابن صیاد بولا: میرے پاس سچی اور جھوٹی دونوں خبریں آتی ہیں۔ نبی کریم صلی اللہ تعالیٰ علیہ وآلہ وسلم نے ارشاد فرمایا: تیرا معاملہ گڈمڈ ہو گیا ہے۔ پھر آپ صلی اللہ تعالیٰ علیہ وآلہ وسلم نے ارشاد فرمایا: میں نے تیرے لیے ایک بات دل میں رکھی ہے (بتا کیا ہے)۔ ابن صیاد نے کہا: وہ «دخ» (دھواں) ہے۔ آپ صلی اللہ تعالیٰ علیہ وآلہ وسلم نے ارشاد فرمایا: دور ہو! تو اپنی حد سے آگے ہرگز نہ بڑھ سکے گا۔ حضرت عمر رضی اللہ تعالیٰ عنہ نے عرض کیا: یا رسول اللہ! مجھے اجازت دیجیے، میں اس کی گردن مار دوں۔ آپ صلی اللہ تعالیٰ علیہ وآلہ وسلم نے ارشاد فرمایا: اگر یہ دجال ہے تو تم اس پر غالب نہ آ سکو گے، اور اگر دجال نہیں ہے تو اسے قتل کرنا تمہارے لیے بہتر نہ ہوگا۔ سالم نے فرمایا: میں نے حضرت ابن عمر رضی اللہ تعالیٰ عنہما کو یہ فرماتے سنا کہ اس کے بعد رسول اللہ صلی اللہ تعالیٰ علیہ وآلہ وسلم حضرت ابی بن کعب رضی اللہ تعالیٰ عنہ کے ساتھ اس کھجور کے باغ کی طرف تشریف لے گئے جہاں ابن صیاد ٹھہرا ہوا تھا۔ آپ صلی اللہ تعالیٰ علیہ وآلہ وسلم چاہتے تھے کہ ابن صیاد کے دیکھنے سے پہلے اس کی کوئی بات سن لیں۔ آپ صلی اللہ تعالیٰ علیہ وآلہ وسلم نے دیکھا کہ وہ اپنی چادر میں لیٹا ہوا ہے جس سے بڑبڑاہٹ یا گنگناہٹ آ رہی تھی۔ ابن صیاد کی ماں نے رسول اللہ صلی اللہ تعالیٰ علیہ وآلہ وسلم کو دیکھ لیا جبکہ آپ صلی اللہ تعالیٰ علیہ وآلہ وسلم کھجور کے تنوں کی آڑ لے رہے تھے۔ اس نے ابن صیاد سے کہا: اے صاف! (یہ ابن صیاد کا نام تھا) یہ محمد (صلی اللہ تعالیٰ علیہ وآلہ وسلم) ہیں۔ ابن صیاد اچانک اچھل پڑا۔ آپ صلی اللہ تعالیٰ علیہ وآلہ وسلم نے ارشاد فرمایا: اگر یہ عورت اسے چھوڑ دیتی تو اس کی حقیقت واضح ہو جاتی۔