الترجمة الأردية

حضرت ابوعبیدہ بن حضرت عبداللہ بن مسعود سے روایت ہے کہ حضرت عبداللہ بن مسعود رضی اللہ تعالیٰ عنہ نے کہا: مشرکین نے رسول اللہ صلی اللہ تعالیٰ علیہ وآلہ وسلم کو خندق کے دن چار نمازوں سے روک دیا۔ یہاں تک کہ رات جتنی اللہ نے چاہی گزر گئی، پھر آپ نے حضرت بلال کو حکم دیا تو انہوں نے اذان کہی، پھر اقامت کہی تو آپ صلی اللہ تعالیٰ علیہ وآلہ وسلم نے ظہر پڑھی، پھر حضرت بلال رضی اللہ تعالیٰ عنہ نے اقامت کہی تو آپ نے عصر پڑھی، پھر حضرت بلال رضی اللہ تعالیٰ عنہ نے اقامت کہی تو آپ نے مغرب پڑھی، پھر انہوں نے اقامت کہی تو آپ صلی اللہ تعالیٰ علیہ وآلہ وسلم نے عشاء پڑھی۔ امام ترمذی فرماتے ہیں: ۱- اس باب میں حضرت ابوسعید اور حضرت جابر رضی اللہ تعالیٰ عنہما سے بھی احادیث آئی ہیں، ۲- حضرت عبداللہ بن مسعود رضی اللہ تعالیٰ عنہ کی حدیث کی سند میں کوئی برائی نہیں ہے سوائے اس کے کہ حضرت ابوعبیدہ نے اپنے باپ حضرت عبداللہ بن مسعود رضی اللہ تعالیٰ عنہ سے نہیں سنا ہے، ۳- اور چھوٹی ہوئی نمازوں کے سلسلے میں بعض اہل علم نے اسی کو پسند کیا ہے کہ آدمی جب ان کی قضاء کرے تو ہر نماز کے لیے الگ الگ اقامت کہے ۱؎ اور اگر وہ الگ الگ اقامت نہ کہے تو بھی وہ اسے کافی ہو گا، اور یہی شافعی کا قول ہے۔