الترجمة الأردية

صالح نے ابن شہاب سے روایت کی ، کہا : مجھے محمد بن عبدالرحمان بن حارث بن ہشام نے بتایا کہ نبی کریم صلی اللہ تعالیٰ علیہ وآلہ وسلم کی اہلیہ حضرت اُمّ المؤمنین عائشہ رضی اللہ تعالیٰ عنہا نے کہا : کہ رسول اللہ صلی اللہ تعالیٰ علیہ وآلہ وسلم کی ازواج مطہرات رضی اللہ تعالیٰ عنہن نے آپ صلی اللہ تعالیٰ علیہ وآلہ وسلم کی صاحبزادی سیدہ فاطمۃالزہراء رضی اللہ تعالیٰ عنہا کو آپ صلی اللہ تعالیٰ علیہ وآلہ وسلم کے پاس بھیجا ۔ انہوں نے اجازت مانگی ، اور آپ صلی اللہ تعالیٰ علیہ وآلہ وسلم میرے ساتھ میری چادر میں لیٹے ہوئے تھے ۔ آپ صلی اللہ تعالیٰ علیہ وآلہ وسلم نے اجازت دی تو انہوں نے کہا کہ یا رسول اللہ! آپ صلی اللہ تعالیٰ علیہ وآلہ وسلم کی ازواج مطہرات نے مجھے آپ صلی اللہ تعالیٰ علیہ وآلہ وسلم کے پاس بھیجا ہے ، وہ چاہتی ہیں کہ آپ صلی اللہ تعالیٰ علیہ وآلہ وسلم ان کے ساتھ ابوقحافہ کی بیٹی میں انصاف کریں ( یعنی جتنی محبت ان سے رکھتے ہیں اتنی ہی اوروں سے رکھیں ۔ اور یہ امر اختیاری نہ تھا اور سب باتوں میں تو آپ صلی اللہ تعالیٰ علیہ وآلہ وسلم انصاف کرتے تھے ) اور میں خاموش تھی ۔ آپ صلی اللہ تعالیٰ علیہ وآلہ وسلم نے ارشاد فرمایا کہ اے بیٹی! کیا تو وہ نہیں چاہتی جو میں چاہوں؟ وہ بولیں کہ یا رسول اللہ! میں تو وہی چاہتی ہوں جو آپ صلی اللہ تعالیٰ علیہ وآلہ وسلم چاہیں ۔ آپ صلی اللہ تعالیٰ علیہ وآلہ وسلم نے ارشاد فرمایا کہ تو حضرت اُمّ المؤمنین عائشہ سے محبت رکھ ۔ یہ سنتے ہی فاطمہ اٹھیں اور ازواج مطہرات کے پاس گئیں اور ان سے جا کر اپنا کہنا اور رسول اللہ صلی اللہ تعالیٰ علیہ وآلہ وسلم کا فرمانا بیان کیا ۔ وہ کہنے لگیں کہ ہم سمجھتیں ہیں کہ تم ہمارے کچھ کام نہ آئیں ، اس لئے پھر رسول اللہ صلی اللہ تعالیٰ علیہ وآلہ وسلم کے پاس جاؤ اور کہو کہ آپ صلی اللہ تعالیٰ علیہ وآلہ وسلم کی ازواج ابوقحافہ کی بیٹی کے مقدمہ میں انصاف چاہتی ہیں ( ابوقحافہ سیدنا حضرت ابوبکر رضی اللہ تعالیٰ عنہ کے والد تھے تو حضرت اُمّ المؤمنین عائشہ رضی اللہ تعالیٰ عنہا کے دادا ہوئے اور دادا کی طرف نسبت دے سکتے ہیں ) ۔ سیدہ فاطمۃالزہراء رضی اللہ تعالیٰ عنہا نے کہا کہ اللہ کی قسم! میں تو اب حضرت اُمّ المؤمنین عائشہ رضی اللہ تعالیٰ عنہا کے مقدمہ میں کبھی رسول اللہ صلی اللہ تعالیٰ علیہ وآلہ وسلم سے گفتگو نہ کروں گی ۔ حضرت اُمّ المؤمنین عائشہ صدیقہ رضی اللہ تعالیٰ عنہا نے کہا کہ آخر آپ صلی اللہ تعالیٰ علیہ وآلہ وسلم کی ازواج نے اُمّ المؤمنین زینب بنت جحش رضی اللہ تعالیٰ عنہا کو آپ صلی اللہ تعالیٰ علیہ وآلہ وسلم کے پاس بھیجا اور میرے برابر کے مرتبہ میں آپ صلی اللہ تعالیٰ علیہ وآلہ وسلم کے سامنے وہی تھیں اور میں نے کوئی عورت ان سے زیادہ دیندار ، اللہ سے ڈرنے والی ، سچی بات کہنے والی ، ناطہٰ جوڑنے والی اور خیرات کرنے والی نہیں دیکھی اور نہ ان سے بڑھ کر کوئی عورت اللہ تعالیٰ کے کام میں اور صدقہ میں اپنے نفس پر زور ڈالتی تھی ، فقط ان میں ایک تیزی تھی ( یعنی غصہ تھا ) اس سے بھی وہ جلدی پھر جاتیں اور مل جاتیں اور نادم ہو جاتی تھیں ۔ انہوں نے رسول اللہ صلی اللہ تعالیٰ علیہ وآلہ وسلم سے اجازت چاہی تو آپ صلی اللہ تعالیٰ علیہ وآلہ وسلم نے اسی حال میں اجازت دی کہ آپ صلی اللہ تعالیٰ علیہ وآلہ وسلم میری چادر میں تھے ، جس حال میں سیدہ فاطمۃالزہراء رضی اللہ تعالیٰ عنہا آئی تھیں ۔ انہوں نے کہا کہ یا رسول اللہ! آپ صلی اللہ تعالیٰ علیہ وآلہ وسلم کی ازواج ابوقحافہ کی بیٹی کے مقدمہ میں انصاف چاہتی ہیں ۔ پھر یہ کہہ کر مجھ پر آئیں اور زبان درازی کی اور میں رسول اللہ صلی اللہ تعالیٰ علیہ وآلہ وسلم کی نگاہ کو دیکھ رہی تھی کہ آپ صلی اللہ تعالیٰ علیہ وآلہ وسلم مجھے جواب دینے کی اجازت دیتے ہیں یا نہیں ، یہاں تک کہ مجھے معلوم ہو گیا کہ آپ صلی اللہ تعالیٰ علیہ وآلہ وسلم جواب دینے سے برا نہیں مانیں گے ، تب تو میں بھی ان پر آئی اور تھوڑی ہی دیر میں ان کو لاجواب کر دیا یا ان پر غالب آ گئی ۔ رسول اللہ صلی اللہ تعالیٰ علیہ وآلہ وسلم مسکرائے اور فرمایا کہ یہ حضرت ابوبکر رضی اللہ تعالیٰ عنہ کی بیٹی ہے ۔