الترجمة الأردية

ابن شہاب نے حضرت انس بن مالک رضی اللہ تعالیٰ عنہ سے روایت کی ، انہوں نے کہا : جب مہاجرین مکہ سے مدینہ آئے تو اس حالت میں آئے کہ ان کے پاس کچھ بھی نہ تھا ، جبکہ انصار زمین اور جائدادوں والے تھے ۔ تو انصار نے ان کے ساتھ اس طرح حصہ داری کی کہ وہ انہیں ہر سال اپنے اموال کی پیداوار کا آدھا حصہ دیں گے اور یہ ( مہاجرین ) انہیں محنت و مشقت سے بے نیاز کر دیں گے ۔ حضرت انس رضی اللہ تعالیٰ عنہ کی والدہ ، جو ام سلیم کہلاتی تھیں اور عبداللہ بن ابی حضرت طلحہ جو حضرت انس رضی اللہ تعالیٰ عنہ کے مادری بھائی تھے ، کی بھی والدہ تھیں ۔ حضرت انس رضی اللہ تعالیٰ عنہ کی ( انہی ) والدہ نے رسول اللہ صلی اللہ تعالیٰ علیہ وآلہ وسلم کو کھجور کے اپنے کچھ درخت دیے تھے ، رسول اللہ صلی اللہ تعالیٰ علیہ وآلہ وسلم نے وہ اپنی آزاد کردہ کنیز ، اسامہ بن زید رضی اللہ تعالیٰ عنہ کی والدہ ، ام ایمن رضی اللہ تعالیٰ عنہا کو عنایت کر دیے تھے ۔ ابن شہاب نے کہا : مجھے حضرت انس بن مالک رضی اللہ تعالیٰ عنہ نے بتایا کہ جب رسول اللہ صلی اللہ تعالیٰ علیہ وآلہ وسلم اہل خیبر کے خلاف جنگ سے فارغ ہوئے اور مدینہ واپس آئے تو مہاجرین نے انصار کو ان کے وہ عطیے واپس کر دیے جو انہوں نے انہیں اپنے پھلوں ( کھیتوں باغوں ) میں سے دیے تھے ۔ کہا : تو رسول اللہ صلی اللہ تعالیٰ علیہ وآلہ وسلم نے میری والدہ کو ان کے کھجور کے درخت واپس کر دیے اور ام ایمن رضی اللہ تعالیٰ عنہا کو رسول اللہ صلی اللہ تعالیٰ علیہ وآلہ وسلم نے ان کی جگہ اپنے باغ میں سے ( ایک حصہ ) عطا فرما دیا ۔ ابن شہاب نے کہا : اسامہ بن زید رضی اللہ تعالیٰ عنہ کی والدہ ام ایمن رضی اللہ تعالیٰ عنہا کے حالات یہ ہیں کہ وہ ( رسول اللہ صلی اللہ تعالیٰ علیہ وآلہ وسلم کے والد گرامی ) عبداللہ بن عبدالمطلب کی کنیز تھیں ، اور وہ حبشہ سے تھیں ، اپنے والد کی وفات کے بعد جب حضرت آمنہ کے ہاں رسول اللہ صلی اللہ تعالیٰ علیہ وآلہ وسلم کی ولادت با سعادت ہوئی تو ام ایمن رضی اللہ تعالیٰ عنہا آپ کو گود میں اٹھاتیں اور آپ کی پرورش میں شریک رہیں یہاں تک کہ رسول اللہ صلی اللہ تعالیٰ علیہ وآلہ وسلم بڑے ہو گئے تو آپ نے انہیں آزاد کر دیا ، پھر زید بن حارثہ رضی اللہ تعالیٰ عنہ سے ان کا نکاح کرا دیا ، وہ رسول اللہ صلی اللہ تعالیٰ علیہ وآلہ وسلم کا وصال سے پانچ ماہ بعد فوت ہو گئیں