الترجمة الأردية

سیدنا عمرو بن عوف رضی اللہ عنہ جو بنی عامر بن لؤی کے حلیف تھے اور جنگ بدر میں شریک تھے، انہوں نے بیان کیا کہ رسول اللہصلی اللہ علیہ وسلمنے سیدنا ابوعبیدہ بن جراح رضی اللہ عنہ کو بحرین جزیہ وصول کرنے کے لیے بھیجا تھا۔ نبی کریمصلی اللہ علیہ وسلمنے بحرین کے لوگوں سے صلح کی تھی اور ان پر سیدنا علاء بن حضرمی رضی اللہ عنہ کو حاکم بنایا تھا۔ جب سیدنا ابوعبیدہ رضی اللہ عنہ بحرین کا مال لے کر آئے تو انصار کو معلوم ہو گیا کہ ابوعبیدہ رضی اللہ عنہ آ گئے ہیں۔ چنانچہ فجر کی نماز سب لوگوں نے نبی کریمصلی اللہ علیہ وسلمکے ساتھ پڑھی۔ جب نبی کریمصلی اللہ علیہ وسلمنماز پڑھا چکے تو لوگ نبی کریمصلی اللہ علیہ وسلمکے سامنے آئے۔ آپصلی اللہ علیہ وسلمانہیں دیکھ کر مسکرائے اور فرمایا:”میرا خیال ہے کہ تم نے سن لیا ہے کہ ابوعبیدہ کچھ لے کر آئے ہیں؟“انصار رضی اللہ عنہم نے عرض کیا:”جی ہاں، یا رسول اللہ!“آپصلی اللہ علیہ وسلمنے فرمایا:”تمہیں خوشخبری ہو، اور اس چیز کے لیے تم پر امید ہو جس سے تمہیں خوشی ہوگی، لیکن اللہ کی قسم! میں تمہارے بارے میں محتاجی اور فقر سے نہیں ڈرتا۔ مجھے اگر خوف ہے تو اس بات کا کہ دنیا کے دروازے تم پر اس طرح کھول دیے جائیں گے جیسے تم سے پہلے لوگوں پر کھول دیے گئے تھے، تو ایسا نہ ہو کہ تم بھی ان کی طرح ایک دوسرے سے جلنے لگو اور یہ جلنا تم کو بھی اسی طرح تباہ کر دے جیسا کہ پہلے لوگوں کو کیا تھا۔“[اللؤلؤ والمرجان/كتاب الزهد والرقائق/حدیث: 1866]