الترجمة الأردية

حضرت حذیفہ رضی اللہ تعالیٰ عنہ سے روایت ہے، انہوں نے فرمایا: رسول اللہ صلی اللہ تعالیٰ علیہ وآلہ وسلم نے ہم سے دو احادیث بیان فرمائی تھیں، ان میں سے ایک تو میں نے (پوری ہوتے) دیکھ لی اور دوسری کا انتظار ہے۔ آپ صلی اللہ تعالیٰ علیہ وآلہ وسلم نے ارشاد فرمایا تھا کہ امانت لوگوں کے دلوں کی جڑوں میں نازل ہوئی، پھر انہوں نے قرآن سے سیکھا، پھر سنت سے سیکھا۔ اور آپ صلی اللہ تعالیٰ علیہ وآلہ وسلم نے ہم سے امانت کے اٹھ جانے کے بارے میں بھی ارشاد فرمایا تھا: آدمی ایک نیند سوئے گا تو اس کے دل سے امانت نکال لی جائے گی اور اس کا نشان ایک ہلکے دھبے کی طرح باقی رہ جائے گا۔ پھر وہ ایک اور نیند سوئے گا تو پھر امانت نکال لی جائے گی اور اس کا نشان آبلے کی طرح باقی رہ جائے گا، جیسے تم نے انگارہ اپنے پاؤں پر گرا لیا ہو اور وہ پھول جائے، تم اسے ابھرا ہوا دیکھو گے لیکن اندر کچھ نہ ہوگا۔ پھر لوگ خرید و فروخت کریں گے لیکن کوئی امانت ادا کرنے والا نہ ہوگا، اور کہا جائے گا: فلاں قبیلے میں ایک امانت دار آدمی ہے۔ اور کسی کے بارے میں کہا جائے گا: کتنا عقلمند، کتنا خوش مزاج، کتنا دلیر ہے! حالانکہ اس کے دل میں رائی کے دانے کے برابر بھی ایمان نہ ہوگا۔ اور مجھ پر ایک زمانہ ایسا بھی گزرا ہے کہ مجھے پروا نہیں ہوتی تھی کہ تم میں سے کس کے ساتھ لین دین کروں — اگر وہ مسلمان ہوتا تو اسلام اسے میرا حق ادا کرنے پر مجبور کرتا، اور اگر نصرانی ہوتا تو اس کا حاکم اسے مجبور کرتا — لیکن آج میں صرف فلاں فلاں سے ہی لین دین کرتا ہوں۔