الترجمة الأردية

ہم سے محمد بن عبدالرحیم نے بیان کیا، کہا ہم سے یزید بن ہارون نے بیان کیا، کہا ہمیں حمید طویل رحمۃ اللہ تعالیٰ علیہ نے حضرت انس بن مالک رضی اللہ تعالیٰ عنہ سے خبر دی کہ رسول اللہ صلی اللہ تعالیٰ علیہ وآلہ وسلم اپنے گھوڑے سے گر گئے جس سے آپ صلی اللہ تعالیٰ علیہ وآلہ وسلم کی مبارک پنڈلی یا مبارک کندھا زخمی ہو گیا۔ آپ صلی اللہ تعالیٰ علیہ وآلہ وسلم نے اپنی ازواج مطہرات سے ایک ماہ تک علیحدگی کی قسم کھائی اور اپنے بالاخانے میں تشریف فرما ہوئے جس کی سیڑھیاں کھجور کے تنوں کی بنی ہوئی تھیں۔ صحابہ کرام رضی اللہ تعالیٰ عنہم مزاج پرسی کے لیے تشریف لائے۔ آپ صلی اللہ تعالیٰ علیہ وآلہ وسلم نے انہیں بیٹھ کر نماز پڑھائی جبکہ وہ کھڑے تھے۔ جب آپ صلی اللہ تعالیٰ علیہ وآلہ وسلم نے سلام پھیرا تو ارشاد فرمایا امام اس لیے بنایا جاتا ہے کہ اس کی پیروی کی جائے۔ پس جب وہ تکبیر کہے تو تم بھی تکبیر کہو، جب وہ رکوع کرے تو تم بھی رکوع کرو، جب وہ سجدہ کرے تو تم بھی سجدہ کرو، اور اگر وہ کھڑے ہو کر نماز پڑھائے تو تم بھی کھڑے ہو کر نماز پڑھو۔ آپ صلی اللہ تعالیٰ علیہ وآلہ وسلم انتیس دن بعد نیچے تشریف لائے۔ لوگوں نے عرض کیا یا رسول اللہ! آپ نے تو ایک مہینے کی قسم کھائی تھی۔ آپ صلی اللہ تعالیٰ علیہ وآلہ وسلم نے ارشاد فرمایا (یہ) مہینہ انتیس دن کا ہے۔