الترجمة الأردية

ہم سے محمد بن مثنیٰ نے بیان کیا، کہا کہ ہم سے عبدالوہاب ثقفی نے بیان کیا۔ (دوسری سند) اور مجھ سے خلیفہ بن خیاط نے بیان کیا کہ ہم سے عبدالوہاب ثقفی نے بیان کیا، کہا کہ ہم سے حبیب معلم نے بیان کیا، ان سے عطاء بن ابی رباح نے اور ان سے حضرت جابر بن عبداللہ رضی اللہ تعالیٰ عنہما نے فرمایا کہ نبی کریم صلی اللہ تعالیٰ علیہ وآلہ وسلم اور آپ کے اصحاب رضی اللہ تعالیٰ عنہم نے حج کا احرام باندھا۔ نبی کریم صلی اللہ تعالیٰ علیہ وآلہ وسلم اور حضرت طلحہ رضی اللہ تعالیٰ عنہ کے سوا اور کسی کے ساتھ قربانی نہیں تھی۔ حضرت علی المرتضیٰ کرّم اللہ تعالیٰ وجہہ الکریم یمن سے تشریف لائے اور ان کے ساتھ بھی قربانی تھی۔ آپ نے فرمایا کہ میں نے وہ احرام باندھا ہے جو نبی کریم صلی اللہ تعالیٰ علیہ وآلہ وسلم نے باندھا ہے۔ نبی کریم صلی اللہ تعالیٰ علیہ وآلہ وسلم نے اپنے صحابہ رضی اللہ تعالیٰ عنہم کو حکم فرمایا کہ (سب لوگ اپنے حج کے احرام کو) عمرہ کا کر لیں، پھر طواف اور سعی کے بعد بال ترشوا لیں اور احرام کھول ڈالیں، لیکن وہ لوگ اس حکم سے مستثنیٰ ہیں جن کے ساتھ قربانی ہو۔ صحابہ رضی اللہ تعالیٰ عنہم نے عرض کیا کہ ہم منیٰ میں اس طرح جائیں گے کہ ہمارے اعضاء سے منی ٹپک رہی ہو؟ یہ بات جب رسول اللہ صلی اللہ تعالیٰ علیہ وآلہ وسلم کو معلوم ہوئی تو ارشاد فرمایا کہ اگر مجھے پہلے معلوم ہوتا جو بعد میں معلوم ہوا تو میں قربانی کا جانور ساتھ نہ لاتا، اور جب قربانی کا جانور ساتھ نہ ہوتا تو میں بھی (عمرہ اور حج کے درمیان) احرام کھول ڈالتا۔ اور حضرت اُمّ المؤمنین عائشہ صدیقہ رضی اللہ تعالیٰ عنہا (اس حج میں) حائضہ ہو گئی تھیں، اس لیے انہوں نے بیت اللہ کے طواف کے سوا تمام ارکانِ حج ادا فرمائے۔ پھر جب پاک ہوئیں تو طواف بھی فرمایا۔ انہوں نے عرض کیا یا رسول اللہ! آپ سب لوگ تو حج اور عمرہ دونوں کر کے تشریف لے جا رہے ہیں لیکن میں نے صرف حج ہی کیا ہے۔ چنانچہ رسول اللہ صلی اللہ تعالیٰ علیہ وآلہ وسلم نے عبدالرحمٰن بن ابی بکر کو حکم فرمایا کہ انہیں تنعیم لے جائیں (اور وہاں سے عمرہ کا احرام باندھیں)۔ اس طرح حضرت اُمّ المؤمنین عائشہ صدیقہ رضی اللہ تعالیٰ عنہا نے حج کے بعد عمرہ فرمایا۔