الترجمة الأردية

ہم سے عبداللہ بن محمد مسندی نے بیان کیا، کہا کہ ہم سے ابوعاصم نبیل نے بیان کیا، کہا کہ مجھے ابن جریج نے خبر دی، کہا کہ مجھے عمرو بن دینار نے خبر دی، کہا کہ میں نے حضرت جابر بن عبداللہ رضی اللہ تعالیٰ عنہما سے سنا، انہوں نے فرمایا کہ (زمانہ جاہلیت میں) جب کعبہ کی تعمیر ہوئی تو نبی کریم صلی اللہ تعالیٰ علیہ وآلہ وسلم اور حضرت عباس رضی اللہ تعالیٰ عنہ بھی پتھر اٹھا کر لا رہے تھے۔ حضرت عباس رضی اللہ تعالیٰ عنہ نے نبی کریم صلی اللہ تعالیٰ علیہ وآلہ وسلم سے عرض کیا کہ اپنا تہبند اتار کر کاندھے پر ڈال لیجیے (تاکہ پتھر اٹھانے میں تکلیف نہ ہو)۔ آپ صلی اللہ تعالیٰ علیہ وآلہ وسلم نے ایسا کیا تو فوراً بیہوش ہو کر زمین پر گر پڑے اور آپ کی مبارک آنکھیں آسمان کی طرف لگ گئیں۔ آپ صلی اللہ تعالیٰ علیہ وآلہ وسلم نے ارشاد فرمایا کہ مجھے میرا تہبند دے دو۔ پھر آپ صلی اللہ تعالیٰ علیہ وآلہ وسلم نے اسے مضبوط باندھ لیا۔