الترجمة الأردية

ہم سے علی بن عبداللہ (ابن مدینی) نے بیان کیا، کہا ہم سے سفیان بن عیینہ نے بیان کیا، ان سے محمد بن منکدر نے بیان کیا، فرمایا میں نے حضرت جابر بن عبداللہ رضی اللہ تعالیٰ عنہما سے سنا، انہوں نے فرمایا: غزوہ اُحد کے دن میرے والد (حضرت عبداللہ بن عمرو بن حرام رضی اللہ تعالیٰ عنہ) کی نعش لائی گئی — (مشرکوں نے) ان کا مُثلہ کیا تھا — اور نعش رسول اللہ صلی اللہ تعالیٰ علیہ وآلہ وسلم کے سامنے رکھی گئی جس پر ایک کپڑا ڈھکا ہوا تھا۔ میں نے چاہا کہ (ان کے چہرے سے) کپڑا ہٹاؤں تو میری قوم نے مجھے روکا۔ پھر میں نے دوبارہ کپڑا ہٹانا چاہا تو پھر میری قوم نے روک دیا۔ اس کے بعد رسول اللہ صلی اللہ تعالیٰ علیہ وآلہ وسلم نے حکم دیا تو جنازہ اٹھایا گیا۔ اسی وقت آپ صلی اللہ تعالیٰ علیہ وآلہ وسلم نے زور سے رونے والی ایک عورت کی آواز سنی اور دریافت فرمایا: یہ کون ہے؟ لوگوں نے عرض کیا: عمرو کی بیٹی ہے یا عمرو کی بہن ہے۔ آپ صلی اللہ تعالیٰ علیہ وآلہ وسلم نے ارشاد فرمایا: یہ کیوں روتی ہے؟ یا (فرمایا) رونا نہیں! ملائکہ برابر اپنے پروں سے ان پر سایہ کیے رہے جب تک جنازہ اٹھایا نہیں گیا۔