الترجمة الأردية

ہم سے عمرو بن عیسیٰ نے بیان کیا، کہا ہم سے ابو عبدالصمد عبدالعزیز بن عبدالصمد نے بیان کیا، کہا ہم سے حصین بن عبدالرحمٰن نے بیان کیا، ان سے ابو وائل نے اور ان سے حضرت عبداللہ بن مسعود رضی اللہ تعالیٰ عنہ نے فرمایا: ہم پہلے نماز میں (مختلف لوگوں کے ناموں کے ساتھ) سلام کیا کرتے تھے اور آپس میں ایک دوسرے کو سلام بھیجتے تھے۔ رسول اللہ صلی اللہ تعالیٰ علیہ وآلہ وسلم نے سن کر ارشاد فرمایا: اس طرح کہا کرو «التَّحِيَّاتُ لِلَّهِ وَالصَّلَوَاتُ وَالطَّيِّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللَّهِ وَبَرَكَاتُهُ، السَّلَامُ عَلَيْنَا وَعَلَىٰ عِبَادِ اللَّهِ الصَّالِحِينَ، أَشْهَدُ أَنْ لَا إِلٰهَ إِلَّا اللَّهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ» یعنی تمام قولی عبادتیں، بدنی عبادتیں اور مالی عبادتیں اللہ ہی کے لیے ہیں۔ اے نبی! آپ پر سلام ہو اور اللہ کی رحمت اور اس کی برکتیں ہوں۔ ہم پر سلام ہو اور اللہ کے تمام نیک بندوں پر۔ میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد صلی اللہ تعالیٰ علیہ وآلہ وسلم اللہ کے بندے اور رسول ہیں۔ اگر تم نے یہ پڑھ لیا تو گویا اللہ کے ہر نیک بندے کو سلام پہنچا دیا جو آسمان اور زمین میں ہے۔