الترجمة الأردية

حضرت مسور بن مخرمہ رضی اللہ تعالیٰ عنہ فرماتے ہیں کہ رسول اللہ صلی اللہ تعالیٰ علیہ وآلہ وسلم نے کچھ قبائیں (اوپری لباس) تقسیم فرمائیں اور مخرمہ (رضی اللہ تعالیٰ عنہ) کو کچھ نہیں دیا۔ تو مخرمہ رضی اللہ تعالیٰ عنہ نے کہا: بیٹے! مجھے رسول اللہ صلی اللہ تعالیٰ علیہ وآلہ وسلم کے پاس لے چلو۔ چنانچہ میں ان کے ساتھ چلا۔ جب وہاں پہنچے تو انہوں نے کہا: اندر جاؤ اور آپ صلی اللہ تعالیٰ علیہ وآلہ وسلم کو میرے لیے بلا لاؤ۔ تو میں نے آپ کو بلایا۔ آپ باہر تشریف لائے، آپ انہیں قباؤں میں سے ایک قبا زیبِ تن فرمائے ہوئے تھے۔ آپ صلی اللہ تعالیٰ علیہ وآلہ وسلم نے (مخرمہ رضی اللہ تعالیٰ عنہ سے) فرمایا: میں نے اسے تمہارے لیے چھپا کر رکھ لیا تھا۔ ابن موہب نے یہ اضافہ نقل کیا ہے کہ مخرمہ نے نظر اٹھا کر دیکھا۔ پھر دونوں (روایتوں) میں اتفاق ہے کہ مخرمہ خوش ہو گئے۔ قتیبہ نے ابن ابی ملیکہ سے ذکر کیا ہے مگر نام نہیں لیا۔